“Рома” Жан Пьеро Гасперини билан келишувга эришди. ESPN нашри хабарига кўра, тажрибали мутахассис янги мавсумдан бошлаб римликларни бошқаради. Ўзбекистон терма жамоаси ва “Рома” ҳужумчиси Элдор Шомуродов бу янгилик юзасидан ўз фикрларини билдирди.
Ҳужумчи YouTube’даги Comment Show подкастида италиялик мураббийнинг “Рома”га келиши ҳақидаги саволларга жавоб берди.
— Элдор, расмий манбаларга кўра, Гасперини “Рома” бош мураббийи сифатида иш бошлайди. Унинг олдинги фаолияти ҳақида қандай фикрдасан? У билан ишлашда қийинчиликлар бўлмайдими?
— Ҳали янгиликдан хабардор эмасман, ҳозир машғулотдан чиқдим.
— Айни пайтда бу янгилик эълон қилинди.
— Яхши янгилик. Чунки Гасперини “Аталанта”ни нолдан олиб чиқиб, Чемпионлар Лигаси даражасига етказгани ҳамма учун маълум. Ҳозир ҳам улар чемпионлик учун курашмоқда. Ўйлайманки, у “Рома”да ҳам яхши натижаларга эришади.
— Унинг ўйин услуби ҳақида қандай фикрдасан? Жисмоний тайёргарлик ва юқори прессингга асосланган ўйин сенга мос келадими?
— Бу ҳақида ҳозирча гапириш эрта. Менинг ўйин услубим ҳам Гасперинининг талабларига жавоб беради деб ўйлайман.
Маълумотларга кўра, “Рома” Гасперини билан 2028 йилгача мўлжалланган шартнома имзолаган.
Эслатиб ўтамиз, Клаудио Раньери мавсум якунида “Рома” бошқарувидан кетди ва клуб тизимида фаолият юритмоқда.
Изоҳ (0)