Футбол бўйича Италия А Серияси клублари 2022/23 йилги мавсум қишки трансферлар ойнасида у қадар фаол ҳаракат қилди деб бўлмайди. Ўзбекистонлик ҳужумчи Элдор Шомуродовнинг “Рома”дан 1,5 миллион евро эвазига “Специя”га ижарага ўтгани лиганинг жорий қишки трансфер ойнасидаги энг қиммат трансферлари ўнлигидан жой олди. Қуйида Италия жамоаларининг январь ойидаги энг қиммат трансферлари топ-10 лиги тақдим этилади.
10. Тио Сипот — “Мура”дан “Специя”га
Трансфер нархи: 700 минг евро
“Специя” қишки трансферлар ойнасида 4 та трансферни амалга оширди. Италиянинг 17-ўрнидан жой олган жамоа кучайтирилишга муҳтож эди. Камтаргина Словения чемпионатидан 19 ёшли Сипот излаб топилди ва унга 1 миллион евродан камроқ пул тўланди. Тио “Мура” сафида жорий мавсум 22 та ўйинда иштирок этиб, 3 та гол ва 2 та голли узатмага муаллифлик қилган.
9. Гиоргос Кирякопулос — “Сассуоло”дан “Болонья”га
Трансфер нархи: 1 миллион евро (ижара)
“Болонья” чап қанот ҳимоясини грек футболчиси билан тўлдирди. 26 ёшли футболчининг ижараси учун 1 миллион евро тўлашга тўғри келди. Кирякопулос 2020 йил сентябрь ойида “Сассуоло”нинг тўлақонли футболчисига айланган эди.
8. Раймондс Кроллис — “Валмиэра”дан “Специя”га
Трансфер нархи: 1,5 миллион евро
“Специя”нинг яна бир янги футболчиси. Италия клуби хўжайинлари латвиялик 21 ёшли ҳужумчининг ўйинидан ҳайратланган ва унга 1,5 миллион евро тўлаб берди. Кроллис ўтган мавсум “Валмиэра” сафида 38 та ўйинда майдонга тушиб, 25 та гол муаллифига айланган.
7. Элдор Шомуродов — “Рома”дан “Специя”га
Трансфер нархи: 1,5 миллион евро (ижара)
Ўзбекистонлик футболчи Италиядаги фаолияти давомида учинчи жамоага (“Женоа”, “Рома” ва энди “Специя”) ўтди. Римликлар сафида ўйин амалиётисиз қолган Элдор ижара асосида “Специя” сафига бориб қўшилди. Шомуродов жорий мавсум “Рома”да 8 та ўйин ўтказиб, битта гол урган.
28 ёшли футболчи “Специя” сафида ҳам аллақачон 2 та ўйин ўтказишга муваффақ бўлди.
6. Йосип Брекало — “Вольфсбург”дан “Фиорентина”га
Трансфер нархи: 1,5 миллион евро
“Фиорентина” ўз таркибини 33 ёшли футболчи билан тўлдирди. Брекалода топ лигаларда ўйнаш тажрибаси етарли. Хорватиялик футболчи 2016 йилдан буён “Вольфсбург”, “Штутгарт” ва “Торино” каби жамоалар шарафини ҳимоя қилиб келган. Унинг ҳисобида Бундеслигада 122 та ўйин, А Серияда 32 та ўйин мавжуд.
5. Матеуш Прашелик — “Шлёнск”дан “Верона”га
Трансфер нархи: 2 миллион евро
“Верона” таркибини кучайтириш учун Польша чемпионатидан номзод топди. Вероналиклар 22 ёшли Прашеликни харид қилди ва январь охирида уни Б Серия вакили “Козенса”га ижарага бериб юборди.
4. Абдулҳамид Сабири — “Сампдория”дан “Фиорентина”га
Трансфер нархи: 2,5 миллион евро
Сабири 2020 йилдан буён Италияда тўп суриб келади. “Фиорентина” футболчи учун “Сампдория”га 2,5 миллион евро тўлаб берди. Ҳозирда жароҳатини даволаш билан машғул бўлган Абдулҳамид 2022/23 йилги мавсумнинг қолган қисмини ҳам генуяликлар таркибида ўтказади.
3. Пшемислав Висневски — “Венеция”дан “Специя”га
Трансфер нархи: 4 миллион евро
Специя клуби 24 ёшли ярим ҳимоячи учун 4 миллион тўлади. Висневски учун “Специя” “Венеция”дан кейин иккинчи италян клуби ҳисобланади.
2. Матеус Мартинс — “Флуминенсе”дан “Удинезе”га
Трансфер нархи: 6 миллион евро
“Удинезе” 19 ёшли бразилиялик учун 6 миллион евро тўлашдан қўрқмади. Фриули жамоаси Мартинсни дарҳол Чемпионшип вакили “Уотфорд”га ижарага бериб юборди. Матеус бунга қадар фақат Бразилия чемпионатида тўп сурган.
1. Антонин Барак — “Верона”дан “Фиорентина”га
Трансфер нархи: 8,5 миллион евро
Барак 2022 йил ёзидаёқ “Фиорентина” сафига ўтган эди. Флоренсияликлар дастлаб ижарага олган футболчисини қишки трансферлар ойнасида “Верона”дан тўлиқ сотиб олди. Антонин жорий мавсум барча мусобақаларда 25 та ўйинда иштирок этиб, 5 та голга муаллифлик қилди.
Изоҳ (0)