Элдор Шомуродовнинг трансфер қиймати икки баробарга қимматлади. Осиёда фақат 5 футболчи ундан қимматроқ

Германиянинг Transfermarkt портали А Серия футболчилари қийматининг янгиланган рейтингини эълон қилди.

Унга кўра «Рома»нинг ўзбекистонлик ҳужумчиси Элдор Шомуродовнинг баҳоси икки баробарга қимматлаб, 14 миллион еврони ташкил қилган. Шомуродовнинг трансфер қиймати 2021 йилнинг мартида 7 миллион еврога баҳоланган ва шу вақтга қадар ўзгармай келаётганди.

Ўзбекистоннинг энг қиммат футболчиси бўлган Элдор бу орқали Осиё минтақасидаги энг қиммат олтинчи футболчига айланди. Ундан олдинда фақат жанубий кореялик Сон Ҳён Мин (85 млн евро; «Тоттенҳэм»), эронлик Сардор Азмун (25 млн евро; «Зенит»), японияликлар Даичи Камада (25 млн евро; «Айнтрахт Ф»), Такеҳиро Томиясу (20 млн евро; «Арсенал») ва форс Меҳди Тареми (16 млн евро; «Порту») бормоқда.

Шомуродов «Рома»нинг энг қиммат футболчилари топ-15 лигидан жой олди (12-ўрин). А Серияда эса 109-ўринда турибди. Футболчи дунё бўйича 680-ўриндан жой олган бўлса, тенгқурлари орасида 74-поғонада.