Ўзбекистон терма жамоаси билан тарихда илк бор Жаҳон чемпионатига йўл олган Элдор Шомуродовнинг АҚШга сафари 2026 йилдан аввал бошланиши мумкин. L’Équipe нашрининг хабар беришича, ҳужумчи MLS (Major League Soccer) — АҚШнинг энг юқори даражадаги футбол лигаси клубларининг биридан таклиф олган.
Манбага кўра, таклиф юборган клуб номи ҳозирча ошкор қилинмаган. Бироқ Рим клуби раҳбарияти футболчининг кетишига қарши эмас, чунки Шомуродовнинг “Рома” билан амалдаги шартномаси 2026 йилнинг июнида якунланади. Шу боис, пойтахт жамоаси ўзбекистонлик футболчини сотиш орқали унинг трансферидан даромад қилишни мақсад қилган.
Ҳужумчининг MLSга кўчиб ўтиши борасидаги миш-мишлар илгари ҳам тарқалган эди. Аввалроқ Шомуродовга АҚШнинг номдор клубларидан бири — “Атланта Юнайтед” қизиқиш билдирган, бироқ трансфер номаълум сабабларга кўра амалга ошмаган.
Шунингдек, Элдорга океанорти мамлакатларидан яна бир таклиф бор. Хусусан, Канаданинг “Торонто” клуби ҳам Шомуродовга қизиқиш билдирган, бироқ футболчини қўлга кирита олмаган. Энди канадаликлар ёзги трансфер ойнаси вақтида Элдор учун расмий таклиф жўнатишга ҳаракат қилиши мумкин.
Маълумот учун, Шомуродов якунига етган мавсумда “Рома”нинг барча мусобақалар доирасидаги 37 ўйинида майдонга тушиб, 7 та гол ва 5 та голли узатмага муаллифлик қилган. Transfermarkt портали ҳужумчининг трансфер қийматини 4 миллион еврога баҳолаган.
Изоҳ (0)