Италия А Сериясида мавсум якунланди. Ўзбекистонлик футболчи Элдор Шомуродов ҳаракат қиладиган “Рома” мусобақа турнир жадвалида 5-ўринни эгаллади.
Шомуродов жорий мавсумда “Рома” сафида анча фаол ўйин кўрсатди. У барча мусобақалар доирасида жами 37 учрашувда майдонга тушиб, 7 та гол ва 5 та ассист муаллифига айланди. Агар Элдор 38-тур доирасидаги “Торино”га қарши баҳсда ҳам гол урганида, ўзининг Италиядаги шахсий рекордини такрорлаган бўларди.
Ўзбекистонлик ҳужумчи А Сериядаги илк мавсумида 8 та гол ва 1 та ассистга муаллифлик қилган ва бу Шомуродов учун Апенин ярим оролидаги энг яхши мавсум ҳисобланади. Шундан кейин ҳужумчи “Рома”, “Специя” ва “Кальяри” каби жамоалар сафида ўйнади, бироқ “Женоа”даги каби самарали ҳаракат қилмаган.
Аммо у якунланган мавсум гол+пас тизими бўйича яхши натижа кўрсатди — 12 балл. Футболчи аввалги йилларда бундай кўрсаткич қайд этмаганди.
Маълумот учун, ҳужумчи 2020 йил йилнинг ёзида “Ростов”дан “Женоа”га ўтган эди. Кейинги мавсум Генуя клуби Шомуродовни “Рома”га трансфер қилди. Ўзбекистонлик футболчи римликлар сафида ўз ўйинини топа олмади ва бир неча мавсум давомида Италиянинг турли клубларида ижара асосида ҳаракат қилди. Аммо ўтган мавсум аввалида Элдор “Рома”га қайтган эди.
Изоҳ (0)