Ўзбекистон Афғонистонга Қурбон ҳайити муносабати билан инсонпарварлик ёрдами юборди. Бу ҳақда Сурхондарё вилояти ҳокимлиги хабар берди.
Қайд этилишича, Шавкат Мирзиёевнинг топшириқлари билан ўзбек халқининг бағрикенглик ва қўллаб-қувватлаш рамзи сифатида “Қурбон ҳайити” (Эид ал-Адҳа) муносабати билан Афғонистон аҳолисига 183 тонна озиқ-овқат маҳсулоти ортилган навбатдаги инсонпарварлик ёрдами юклари Балх вилоятига етказилди.
Инсонпарварлик юклари Ҳайратон шаҳридаги “Астрас” компанияси ҳудудида Ўзбекистон президентининг Афғонистон бўйича махсус вакили Исматилла Эргашев, Сурхондарё вилояти ҳокими Улуғбек Қосимов ҳамда Балх вилояти губернаторининг ўринбосари Нурулҳоди Абуидрис, шунингдек, икки томон расмийлари иштирокида топширилди.
Инсонпарварлик ёрдами таркибидан ун, гуруч, шакар, макарон ва қандолат маҳсулотлари, ўсимлик ёғи, тез тайёрланадиган таомлар, қизил ловия ва мош ўрин олган.
Афғонистон расмийлари Ўзбекистон президенти ва халқига кўрсатаётган инсонпарварлик ёрдами учун миннатдорлик билдириб, Қурбон ҳайити муносабати билан табрикларини йўллаган.
Ўтган йилнинг декабрь ойида президент Шавкат Мирзиёевнинг топшириғи билан, Афғонистон аҳолисига инсонпарварлик ёрдами ва “Саломатлик” поезди жўнатилганди.
Апрель ойида Сурхондарё вилояти ҳокими Улуғбек Қосимов бошчилигидаги делегация Ўзбекистон халқи номидан биродар афғон халқига навбатдаги инсонпарварлик ёрдамини етказган эди.
Март ойида эса Наврўз ва Рамазон ҳайити муносабати билан Ўзбекистон Афғонистонга 200 тоннадан ортиқ озиқ-овқат маҳсулотлари ортилган инсонпарварлик ёрдами жўнатилган эди.
Шунингдек, 2023 йил апрелда ҳам Ўзбекистондан афғон халқига 185 тоннадан ортиқ зарурий озиқ-овқат маҳсулотлари ортилган навбатдаги инсонпарварлик ёрдамини жўнатганди.
2022 йилда бўлса зилзила оқибатида жабр кўрганларга ёрдам кўрсатиш мақсадида Ўзбекистон президенти Шавкат Мирзиёев топшириғига биноан Афғонистонга навбатдаги инсонпарварлик ёрдами юборилган эди.
Изоҳ (0)