Америкалик олимлар кенг кўламли ва узоқ муддатли тадқиқот ўтказиб, қаҳванинг аёллар саломатлигига таъсирини ўрганди. Натижалар шуни кўрсатдики, ҳар куни эрталаб ичиладиган бир пиёла қаҳва аёлларни нафақат тетиклантиради, балки соғлом қариш жараёнига ҳам ёрдам беради.
Тадқиқот доирасида 30 йил давомида қарийб 50 минг аёлнинг ҳаёти кузатиб борилди. Олимлар уларнинг овқатланиш одатлари ва турмуш тарзини тўлиқ ўрганиб, ҳар тўрт йилда маълумотларни янгилаб келди. Қаҳва, чой ва газли ичимликлар орқали олинадиган кофеин миқдори махсус сўровномалар жавоби асосида баҳоланди.
Тадқиқот шуни кўрсатдики, ўрта ёшда (тахминан 45–60 ёш оралиғида) кофеинли қаҳвани мунтазам ичган аёллар қариганда ҳам жисмоний, ҳам ақлий салоҳиятини яхши сақлаб қолган. Таркибида кофеини бор бошқа ичимликлар — чой ва кола кабилар бундай ижобий таъсир кўрсатмади.
Таҳлил учун иштирокчилар ҳар куни истеъмол қиладиган ҳар 80 миллиграмм кофеин кўриб чиқилди. Бунда тана вазни, чекиш, спиртли ичимликлар истеъмол қилиш, жисмоний фаоллик, таълим даражаси ва рациондаги оқсил каби бошқа омиллар ҳам ҳисобга олинди.
Маълумотлар 1984 йилдан бошлаб тўпланган. 2016 йилга келиб 3706 нафар аёл соғлом қариш мезонларига жавоб берган. Ўрта ёшда улар кунига ўртача 315 миллиграмм кофеин истеъмол қилган — бу тахминан учта кичик ёки бир ярим катта финжон қаҳвага тенг. Кофеиннинг 80 фоиздан ортиғи айнан қаҳва орқали олинган.
Қаҳванинг ҳар бир қўшимча пиёласи соғлом қариш эҳтимолини 2–5 фоизга оширган. Шундай қилиб, кунига беш кичик ёки тахминан икки ярим катта финжон қаҳва истеъмол қилиш кексаликда соғлом бўлиш эҳтимоли юқорилиги билан боғлиқ бўлган.
Соғлом қариш тушунчаси деганда 70 ёшдан ошгач ҳам соғлом ҳаёт кечириш, яъни сурункали касалликлардан холи бўлиш, жисмоний фаолликни сақлаб қолиш, ақлий ва руҳий жиҳатдан барқарор бўлиш ҳамда хотира билан боғлиқ муаммоларга дуч келмаслик тушунилади.
Изоҳ (0)