Қалқонсимон без патологияларида чарчоқ кундалик ҳаётнинг нормал давом этишига халақит берадиган даражага етиши мумкин. Бу ҳақда эндокринолог Камила Табеева “Газета.ру”га берган интервьюсида айтиб ўтди.
Шифокорнинг тушунтиришича, қалқонсимон без фаолияти пасайганда беморларда умумий ҳолдан тойиш кузатилиши мумкин.
-cebPS619.avif)
“Амалиётда биз кўпинча уйқучанлик, ҳолсизлик, тетикликнинг пасайиши, хотиранинг сусайиши, шишиш каби белгиларга дуч келамиз. Шу билан бирга, чарчоқ қалқонсимон без касалликларининг кенг тарқалган белгисидир. Бироқ кўпинча беморлар буни бошқа сабабларга — иш жадвали, мавсумийлик, стресс, нотўғри овқатланишга боғлашади. Улар сўнгги дақиқагача шифокорга мурожаат қилишмайди, белги ўз-ўзидан ўтиб кетади деб ўйлашади”, деди у.
Шифокорнинг сўзларига кўра, қалқонсимон без гормонларининг меъёрдан ошгани, яъни тиреотоксикоз ҳам ҳолсизликни келтириб чиқариши мумкин, аммо бу ҳолда белгилар қўшимча равишда юрак уришининг тезлашиши, қўлларнинг титраши ва вазн йўқотишни ўз ичига олиши мумкин. Шунингдек, қалқонсимон без билан боғлиқ муаммолар туфайли юзага келадиган чарчоқ оддий чарчоқдан фарқ қилади.
“Бундай чарчоқ жуда кучли бўлиши мумкин — беморлар баъзан бошларини ёстиқдан кўтара олмасликларини айтишади. Шунингдек, кўплаб беморлар одатдагидан кўпроқ ухлаётганларини сезишади, лекин барибир ўзларини ҳолдан тойган деб ўйлашади. Уларда жисмоний машқлар учун қувват етишмайди, эрталаб ўриндан туриб, кунни бошлаш қийин бўлиши мумкин. Бундан ташқари, тез-тез йиғлаш ҳолати ҳам пайдо бўлади”, деб таъкидлади у.
Мутахассиснинг айтишича, агар сиз илгари тетик бўлган бўлсангиз-у, тўсатдан аҳволингиз ёмонлашганини сезиб қолсангиз, бу эндокринологга мурожаат қилиш учун сабаб ҳисобланади. Зарур таҳлиллардан сўнг мутахассис сизнинг ҳолатингиз қалқонсимон без фаолиятининг бузилиши билан боғлиқ эканлигини аниқлай олади.
Изоҳ (0)