Россияда патент ёки яшаш учун рухсатнома (ВНЖ) олишни истаган мигрантлар учун рус тили имтиҳонлари мураккаблаштирилади. Бу ҳақда Таълим соҳасида назорат бўйича федерал хизмат (“Рособрнадзор”) хабар берди.
Имтиҳонда тинглаб тушуниш топшириқлари сони иккитадан тўрттага оширилади. Имтиҳонни муваффақиятли топшириш учун мажбурий минимал балл белгиланади. “Рособрнадзор” худди шундай мажбурий баллар тизимини гапириш бўлими учун ҳам жорий этди. Бу баллар вақтинчалик яшаш учун рухсатнома ёки доимий яшаш ҳуқуқини олиш учун талаб этилади. Ўзгартиришлар 2025 йил 10 июлдан кучга киради.
Бундан ташқари, 2025 йил 23 июндан бошлаб имтиҳонлар учун саволлар банки икки баравар кўпайтирилади. “Рособрнадзор” бу ўзгаришлар рус тилини билиш даражасини адолатли баҳолаш ва Россияда яшашни хоҳлайдиган чет элликларни тил ўрганишга рағбатлантиришга хизмат қилишини билдирган.
2026 йил 1 январдан бошлаб эса рус тили (чет тили сифатида), Россия тарихи ва қонунчилик асослари бўйича барча имтиҳонлар фақат компьютер ва масофавий технологиялар ёрдамида ўтказилади. Бу ҳақда илгари Россия фан ва олий таълим вазири ўринбосари Константин Могилевский айтганди.
Изоҳ (0)