Rossiyada patent yoki yashash uchun ruxsatnoma (VNJ) olishni istagan migrantlar uchun rus tili imtihonlari murakkablashtiriladi. Bu haqda Ta’lim sohasida nazorat bo‘yicha federal xizmat (“Rosobrnadzor”) xabar berdi.
Imtihonda tinglab tushunish topshiriqlari soni ikkitadan to‘rttaga oshiriladi. Imtihonni muvaffaqiyatli topshirish uchun majburiy minimal ball belgilanadi. “Rosobrnadzor” xuddi shunday majburiy ballar tizimini gapirish bo‘limi uchun ham joriy etdi. Bu ballar vaqtinchalik yashash uchun ruxsatnoma yoki doimiy yashash huquqini olish uchun talab etiladi. O‘zgartirishlar 2025-yil 10-iyuldan kuchga kiradi.
Bundan tashqari, 2025-yil 23-iyundan boshlab imtihonlar uchun savollar banki ikki baravar ko‘paytiriladi. “Rosobrnadzor” bu o‘zgarishlar rus tilini bilish darajasini adolatli baholash va Rossiyada yashashni xohlaydigan chet elliklarni til o‘rganishga rag‘batlantirishga xizmat qilishini bildirgan.
2026-yil 1-yanvardan boshlab esa rus tili (chet tili sifatida), Rossiya tarixi va qonunchilik asoslari bo‘yicha barcha imtihonlar faqat kompyuter va masofaviy texnologiyalar yordamida o‘tkaziladi. Bu haqda ilgari Rossiya fan va oliy ta’lim vaziri o‘rinbosari Konstantin Mogilevskiy aytgandi.
Izoh (0)