Мозамбик шимолида исёнчилар томонидан камида 120 нафар бола ўғирлаб кетилди. Бу ҳақда Human Rights Watch (HRW) ҳисоботига таяниб, CNN хабар берди.
Кабо Делгадо провинциясида одамларни ўғирлаш ҳолати кўпаймоқда. Болаларни маҳаллий аҳоли орасида “аш-Шабаб” номи билан танилган “Ислом давлати”га алоқадор гуруҳ ўғирлаган. Ўғирланганлардан талон-тарож қилинган товарларни ташиш, мажбурий меҳнат қилиш, баъзи ҳолларда эса аскар сифатида хизмат қилиш учун фойдаланилмоқда. Болаларни мажбуран турмушга бериш ҳолатлари ҳам учрамоқда.
Мозамбик 2017 йилдан бери Кабо Делгадудаги қўзғолонга қарши курашиб келади. Ҳукумат кучлари Руанда, Жанубий Африка Республикаси ва бошқа минтақавий ҳамкорлар томонидан юборилган қўшинлар ёрдамига таяниб, зўравонликни тўхтатиш учун курашмоқда.
Исёнчилар 2020 йилда ҳужумлар тўлқинини амалга ошириб, ўнлаб одамларнинг, жумладан, болаларнинг бошини танасидан жудо қилганди. Гувоҳларнинг айтишича, шаҳар ва қишлоқлардан ўғирлаб кетилганлар жангари сифатида фойдаланилган.
Бирлашган Миллатлар Ташкилоти маълумотларига кўра, зўравонлик оқибатида 600 мингдан ортиқ одам бошқа ҳудудларга кўчирилган. HRW сўнгги 2 ой ичида ҳужумлар ва болаларни ўғирлаш ҳолатлари яна кўпайганини маълум қилган. Ташкилот Мозамбик ҳукуматини болаларни топиш ва келажакдаги ўғирликларнинг олдини олиш учун ҳаракат қилишга чақирган.
Норвегия қочқинлар кенгаши (NRC) бош котиби Ян Эгеланд июнь ойида Кабо Делгадога ташрифида, вазиятни “эътибордан четда қолган инқироз” деб атаганди.
“Иқлим муаммолари, зўравонлик ва очарчиликнинг кучайиши аҳолига даҳшатли таъсир кўрсатмоқда”, деди Эгеланд.
NRC’нинг таъкидлашича, 5 миллиондан ортиқ одам ўта оғир, 900 мингдан ортиқ одам эса фавқулодда очликни бошдан кечирмоқда.
Изоҳ (0)