Шанхайда сунъий интеллект асосида яратилган илк тўлиқ метражли анимацион фильм тақдим этилди. “A Better Tomorrow: Cyber Border” (“Порлоқ келажак: кибер чегаралар”) деб номланган бу картина эски жангари фильмлар руҳида бўлса-да, технологик жиҳатдан бутунлай янги ёндашув асосида ишланган.
Фильм Quantum Animation номли рақамли алгоритмлар ёрдамида қайта яратилган. Лойиҳа устида бор-йўғи 30 нафар одам меҳнат қилган.
Quantum Animation технологияси сценарий яратиш, қаҳрамон моделларини қуриш, анимациялар ҳаракатини ишлаб чиқиш, овозларни сунъий тарзда синтез қилиш ва визуал эффектлар бериш каби кинога хос деярли барча техник вазифаларни бажаради. Дастур матн асосида мимика ва ҳаракатларни танлайди, кадрлар эса булутли серверлар орқали генерация қилинади. График тезлаткичлар ва визуал рендеринг тизими туфайли фильмнинг якуний монтажи бир кунда тайёр бўлади. Анъанавий усулда бу жараён бир неча йил талаб қилган бўларди.
Ушбу ташаббус доирасида Хитойда кунг-фу ҳақидаги 100 та классик фильм рақамлаштирилиб, замонавий форматда қайта ишланади. Бунда сунъий кўриш технологияси қўлланилади: у ҳар бир кадрни шовқин ва хираликлардан тозалайди, рангларни тиклайди, овозни қайта ишлайди. Нейротармоқ классик фильмларнинг атмосферасини йўқотмасдан уларни бугунги кино стандартларга мослаштиришга ҳаракат қилади.
Лойиҳа муаллифларининг фикрича, бу ташаббус кунг-фу жанрига ҳаёт бахш этадиган янги медиа-экотизим яратишга хизмат қилади. Классик фильмлар интерактив форматларда — ўйинлар, аниме, сериаллар кўринишида қайта “тирилади”.
Бу технологиялар ижодкорликнинг ўрнини эгаллаш учун эмас, балки унга ёрдам бериш ва техник юкни енгиллаштириш учун жорий этилмоқда. Сунъий интеллект ҳар қандай ғоянинг тез ва самарали шаклланишига кўмаклашади.
Ёш мутахассисларни тайёрлаш мақсадида Шанхайда махсус илмий марказ ҳам ташкил этилган. Талабалар бу ерда генератив моделларни кино соҳасида қандай қўллашни ўрганади.
Изоҳ (0)