Япония Филиппинга ўзининг ишлатилган эсминецларини экспорт қилади. Токио бу қарорга Пекиннинг Жанубий Хитой денгизидаги таъсирига қарши туриш мақсадида келган.
Маҳаллий Yomiuri газетасига кўра, томонлар Хитойга биргаликда қарши туриш учун ҳамкорликни янада кучайтиришни режалаштирмоқда.
Унга биноан, Япония Ўзини мудофаа қилиш кучлари таркибида 30 йилдан ортиқ хизмат қилган Абукума синфидаги 6 та эсминец Филиппинга топширилади. Бу ҳақда нашр ўзининг ҳукуматдаги манбаларига таяниб хабар берди.
“Япония мудофаа вазири Ген Накатани ва унинг филиппинлик ҳамкасби Гилберто Теодоро ўтган ой Сингапурда бўлиб ўтган учрашувда бу борада келишувга эришиб, қўл сиқишган. Филиппин ҳарбийлари ушбу эсминецларни текшириш учун шу ёздаёқ келади”, деб ёзган Yomiuri.
Япония мудофаа вазирлиги вакили бу борада Reuters’га изоҳ беришдан бош тортди. Агентлик Филиппин ҳарбийлари ва Хитой ташқи ишлар вазирлиги вакилларидан ҳам жавоб ололмади.
Токио Хитойни Шарқий Хитой денгизи, Манила эса Жанубий Хитой денгизида агрессив ҳаракат қилиш ва ўз таъсир доирасини кучайтиришда айблаб келади.
Томонлар ўзаро ҳарбий ҳамкорлик доирасида вақти-вақти билан қўшма машғулотлар ўтказиб келади. Ялония ва Филиппин ўтган йили икки давлат ҳарбий кучларининг бир-бирлари ҳудудида жойлаштиришга имкон берувчи келишувни имзолади.
Маълумот учун, Абукума синфидаги эсминецлар нисбатан кичик кема бўлиб, тахминан 120 кишилик экипажга эга. Улар сувости кемаларига ва кемаларга қарши ракеталар, торпедолар ва тўплар билан жиҳозланган.
Филиппин денгиз кучлари ҳозирча эсминецларга эга эмас, мамлакат ҳарбий флотида фақат фрегатлар ва корветлар мавжуд бўлиб, улар одатда кичикроқ ва енгил қуролланган бўлади.
Изоҳ (0)