Пекин суди журналист Донг Ююни жосусликда айблаб, етти йиллик қамоқ жазосига ҳукм қилди. Бу ҳақда Reuters агентлиги хабар қилди.
Донг Юю Хитой Коммунистик партиясига қарашли Guangming Daily газетасида бўлим муҳаррири ўринбосари бўлган. У 2022 йилда япон дипломати билан тушлик қилаётганда ҳибсга олинган. Япониялик эркак ҳам бир неча соат ҳибсга олинган, бу эса Япония Ташқи ишлар вазирлигининг норозилигига сабаб бўлган.
Донг Юю оиласига кўра, ҳукмда журналист учрашган икки япон дипломати “айғоқчи ташкилот агентлари” деб аталган. Маълум қилинишича, Донг Юю мунтазам равишда хорижий дипломатлар ва журналистлар билан учрашиб туради.
Донг Юю Guangming Daily газетасида 1987 йилдан бери ишлайди. Ғарб оммавий ахборот воситалари ёзишича, у ўз мақолаларида Хитой раҳбариятини бевосита танқид қилмасдан, мўтадил ислоҳотларни ёқлаган.
У 2007 йилда Гарвард университетида Ниман стипендиясини олган ва кейинчалик Япония университетларида маъруза ўқиш учун таклиф қилинган.
Аввалроқ Хитой ҳукуматида ишлаган эр-хотин Британия фойдасига жосуслик қилишда айбланиб ҳибсга олинганди.
Хабар берилишича, ҳибсга олинганлар Буюк Британиянинг МI6 махфий разведка агентлигига маълумот узатишда айбланган.
Хитойнинг Давлат хавфсизлик вазирлиги ҳодиса юзасидан махсус баёнот эълон қилган. Унда расмийлар МI6 билан боғлиқ “йирик жосуслик иши” фош қилингани айтилган. Ушбу фош қилинган тармоқ, ҳеч шубҳасиз, Британия хатти-ҳаракатлари натижаси эканлиги билдирилган.
Изоҳ (0)