Таиланд пойтахти Бангкокда АҚШ, Хитой ва Тинч океанининг бошқа 19 давлати раҳбарлари учрашадиган Осиё—Тинч океани иқтисодий ҳамкорлиги (APEC) саммити ўтказиладиган жойдан бир неча юз метр нарида демократия тарафдорлари намойиш ўтказди. Намойишлар полиция билан тўқнашувга айланиб кетди.
Намойишчи гуруҳлар бош вазир Прают Чан-Очанинг сиёсатига қарши чиқиб, унинг истеъфосини ҳамда умумий сайловлар ўтказишни талаб қилмоқда. Шунингдек, улар сиёсий маҳбусларни озод қилишни ва қироллик оиласини ҳақорат қилиш ёки туҳмат қилганлик учун 15 йилгача қамоқ жазосини назарда тутувчи қонунга ўзгартириш киритиш талабини илгари сурмоқда.
Намойишчилар Бангкокда ўтказилаётган саммитни «ёлғонлар фестивали» деб атади.
Митингларнинг кенгайишига йўл қўймаслик учун пойтахт бўйлаб ўн минглаб полиция ва ҳарбий хизматчилар жойлаштирилди. Улар одамларни тарқатиш учун турли усулларни қўлламоқда.
Бангкокда Осиё-Тинч океани иқтисодий ҳамкорлиги саммити 18 ноябрь куни бошланади.
Саммитнинг асосий тадбирлари сифатида 18 ва 19 ноябрь кунлари иккита ялпи мажлис бўлиб ўтади. Биринчи мажлис мавзуси «Мувозанатли, инклюзив ва барқарор ўсиш». Иккинчи сессия савдо ва инвестицияларни ривожлантиришга бағишланади. Саммит дастурида, шунингдек, делегациялар раҳбарларининг APEC Ишбилармонлар маслаҳат кенгаши билан учрашуви ҳам кўзда тутилган.
APEC — Осиё-Тинч океани минтақасидаги 21 та давлат иқтисоди учун минтақавий савдо ва инвестицияларни эркинлаштириш бўйича ҳамкорлик форумидир. Унда Австралия, Бруней, Канада, Индонезия, Япония, Корея Республикаси, Малайзия, Янги Зеландия, Филиппин, Сингапур, Таиланд, АҚШ, Тайван, Гонконг, Хитой, Мексика, Папуа-Янги Гвинея, Чили, Перу, Россия, Вьетнам иштирок этади.
Изоҳ (0)