Япониянинг Сидзука префектураси округ суди 47 йилдан ортиқ ноҳақ қамоқда ўтирган ва кейинчалик оқланган 89 ёшли Ивао Ҳакаматага тахминан 217 миллион иена (тахминан 1,44 миллион доллар) товон тўлашга қарор қилди. Бу ҳақда Тҳе Маиничи хабар берди. Ҳакамата 1966 йилда Сидзуока префектурасида тўрт кишидан иборат оилани ўлдирганликда айбланиб, ўлим жазосига ҳукм қилинган. Аммо 2024 йил октябрь ойида ўтказилган такрорий суд жараёнида у оқланган. Суд тергов органлари далилларни сохталаштирганини аниқлаган. Жабрланувчининг адвокати Ҳакамата 47 йил ва етти ой давомида ноҳақ ҳибсда сақланганини таъкидлади. У товон пули талаб қилиб, 2025 йил январь ойида судга мурожаат қилди. Баёнотда, эркак ҳали ҳам қамоқ жазосидан азият чекаётгани айтилган. Суд товон тўлаш талабини қабул қилган, эркак тахминан 33 йил ўлим жазосини кутиб, “ғоят кучли” руҳий ва жисмоний азоб-уқубатларни бошдан кечиргани таъкидланган. Ҳакаматага суд томонидан белгиланган товон миқдори Япония тарихидаги энг юқори кўрсаткич бўлди. Ҳуқуқий ҳимоячилари Сидзуока префектураси ва миллий ҳукуматга қарши ҳам даъво қўзғатишни режалаштирмоқда. Япониялик фуқаронинг адвокати суднинг товон тўлаш ҳақидаги қарорини шарҳлар экан, ҳокимият вакиллари “200 миллион иена билан қоплаб бўлмайдиган жиноят” содир этганини таъкидлади.
Мавзуга доир
×![Lightbox Image]()
Изоҳ (0)