FIFA 2027 йилда ўтказилиши режалаштирилган U-20 Жаҳон чемпионати мезбонлигини аниқлаш жараёнига киришди. Шу боис Ўзбекистон ва Озарбайжон футбол федерациялари ёшлар ўртасидаги ушбу нуфузли мусобақани биргаликда ўтказиш учун FIFA’га ариза юборди. Бу ҳақда Ўзбекистон футбол ассоциацияси хабар берди.
Бугунги кунда Ўзбекистон ва Озарбайжон мезбонликка ҳар томонлама тайёр экани таъкидланмоқда. Сўнгги йилларда мамлакатдаги стадионлар халқаро стандартларга мувофиқ замонавий ҳолатга келтирилди. Бундан ташқари, Осиё U-20 ва U-23 мусобақалари, шунингдек, Марказий Осиё тарихида илк бор ўтказилган футзал бўйича Жаҳон чемпионати мезбонлиги Ўзбекистон учун катта тажриба ҳисобланади. Ушбу тадбир FIFA президенти Жанни Инфантино томонидан тарихдаги энг яхши мундиаллардан бири сифатида эътироф этилган, дейилади ЎФА хабарида.
Маълумот учун, футбол бўйича U-20 Жаҳон чемпионати ҳар икки йилда ўтказилади. 20 ёшгача бўлган футболчилар ўртасидаги навбатдаги мундиал 2025 йилнинг 27 сентябрдан 19 октябрга қадар Чили майдонларида ўтказилади. Ушбу мусобақада Осиё қитъасидан 4 та жамоа — Австралия, Саудия Арабистони, Япония ва Жанубий Корея иштирок этади.
Изоҳ (0)