Тошкент шаҳри Олмазор туманида нафақахўр қариндошининг номига, уни алдаб онлайн кредит олган фуқаро аниқланди. Бу ҳақда Тошкент шаҳар ИИББ матбуот хизмати хабар қилди.
Қайд этилишича, М. исмли шахс нафақа ёшида бўлган қариндошининг номига унинг хабарисиз, 35 миллион сўм онлайн кредит расмийлаштириб олган. Ушбу маблағлар жорий йилнинг май-июнь ойларида иккига бўлиб банк картасига ўтказиб олинган ва фуқаро пулларни ўз эҳтиёжи учун сарфлаб юборган.
“Ўзимга ишонгандек ишонгандим, ўз боламдек кўргандим. Клик қилиб оламан деб менинг расмимни банкка жўнатибдилар. “Документ”ни жуда эҳтиёт қилиш керак экан”, деган жабрланувчи.
Ҳозирда мазкур ҳолат юзасидан фуқарога нисбатан Жиноят кодексининг 168-моддаси 3-қисм “г” банди билан жиноят иши қўзғатилиб, тергов ҳаракатлари ўтказилмоқда.
Таъкидлаш жоиз, ушбу жиноятни содир этганлик учун Ўзбекистон қонунчилигига кўра 10 йилгача озодликдан маҳрум қилиш жазоси тайинланиши мумкин.
Изоҳ (0)