Соғлиқни сақлаш вазирлиги Республика ихтисослаштирилган хирургия илмий-амалий тиббиёт марказида амалга оширилаётган трансплантация операциялари ҳақида маълумот берди.
Қайд этилишича, айни пайтда мамлакатда 3000 нафардан ортиқ бемор дастурли диализ муолажасини қабул қилади. Бу эса бемор ҳолатини бироз қийинлаштиради. Уларнинг 1178 нафари сурункали буйрак етишмовчилигининг терминал босқичида бўлиб, трансплантация операциясига муҳтож.
Шу кунгача Ўзбекистонда биргина академик B.Воҳидов номидаги Республика ихтисослаштирилган хирургия илмий-амалий тиббиёт марказида яқин қариндошлар орасида 711 та ана шундай мураккаб амалиёт ўтказилган.
Трансплантация хизмати замонавий жарроҳлик ва умуман тиббиётни ривожлантиришнинг истиқболли йўналишларидан. Қолаверса, соҳанинг энг мураккаб, ўта масъулиятли ва айни пайтда эҳтиёж ортиб бораётган йўналишларидан бири ҳам айнан тана аъзоларини кўчириб ўтказиш амалиёти ҳисобланади. Бироқ бундан 5-6 йил илгари бу масала жуда қийин эди. Аниқроғи, Ўзбекистонда трансплантация амалиётларининг ҳуқуқий асослари мавжуд бўлмаган, — дейди мазкур марказ директори Саидмурод Исмоилов.Марказда жарроҳликнинг энг мураккаб йўналишлари ишлаб чиқилиши натижасида ўтган 2021 йилнинг ўзида 230 та ана шундай амалиёт бажарилган. 2022 йилнинг биринчи 6 ойида эса 143 та операция муваффақиятли ўтказилган.
Буйрак трансплантациясига бўлган юқори эҳтиёж туфайли бугунги кунда марказда бундай мураккаб амалиётлар икки сменада, яъни ҳафтасига 7—8 нафар беморда бажарилмоқда.
Изоҳ (0)