АҚШнинг собиқ президенти Билл Клинтон ва унинг рафиқаси, собиқ давлат котиби Ҳиллари Клинтонга молиячи Жеффри Эпштейн иши бўйича гувоҳлик бериш учун чақирув қоғози юборилди. Бу чақирувни АҚШ Вакиллар палатасининг назорат ва ҳукумат ислоҳоти қўмитаси жўнатган. Тегишли маълумотлар қўмита расмий веб-сайтида эълон қилинди.
Клинтонлардан ташқари, шунга ўхшаш чақирув қоғозларини Федерал қидирув бюросининг собиқ директорлари Жеймс Коми ва Роберт Мюллер, шунингдек, собиқ бош прокурорлар Лоретта Линч, Эрик Холдер, Меррик Гарленд, Уилям Барр, Жефф Сешнс ва Альберто Гонсалес ҳам олишган.
Ҳужжатга кўра, сўроқлар 18 августда бошланиб, октябрь ойининг ўрталаригача давом этади. Билл Клинтон 14 октябрь куни, Ҳиллари Клинтон эса 9 октябрь куни кўрсатма бериш учун чақирилади. Бундан ташқари, қўмита раиси Жеймс Комер АҚШ Адлия вазирлигига Эпштейн фаолиятини текшириш билан боғлиқ барча ҳужжатларни 19 августгача тақдим этиш тўғрисида алоҳида талаб юборган.
19 июль куни Дональд Трамп бош прокурор Пам Бондига Жеффри Эпштейн иши бўйича ҳакамлар ҳайъати томонидан йиғилган барча махфий материалларни ошкор қилишни топширганини эълон қилди.
23 июль куни The Wall Street Journal газетаси президент маъмуриятидаги юқори лавозимли манбаларга таяниб АҚШ Адлия вазирлиги ходимлари молиячи Жеффри Эпштейн иши бўйича ҳужжатларни ўрганиб чиқиб, уларда Дональд Трампнинг номи бир неча бор қайд этилганини аниқлаганини ёзди.
Инвестиция банкири Жеффри Эпштейн 2008 йилда вояга етмаган қизни зўрлагани ва фоҳишабозликни ташкил этгани учун айбини тан олиб, ҳукм қилинган эди. У 2019 йил ёзида АҚШда яна қамоққа олинди. Эпштейн 14 ёшли қизларни ҳам ўз ичига олган ҳолда, қизлар савдоси ва уларни фоҳишабозликка ундашда айбланди. Ўша йилнинг август ойида 66 ёшли Эпштейн суд жараёнини кутмай, қамоқхонада ўзини ўлдирди.
Эпштейн иши бўйича материалларни эълон қилиш АҚШ президенти Дональд Трампнинг сайловолди ваъдаларидан бири ҳисобланади.
Изоҳ (0)