Бухоро вилояти Қоракўл туманида 2 ёшли бола тангаларни ютиб юборгани аниқланди. Бу ҳақда вилоят Соғлиқни сақлаш бошқармаси хабар берди.
Келтирилишича, 2023 йилда туғилган Ғиёсов Мироншох исмли бола юқори қизилўнгач тораймасида ёт жисм қолиб кетгани сабабли шошилинч қабулхона бўлимига олиб келинди. Бу ҳолат эътиборсизлик оқибатида юзага келган.
Қайд этилишича, навбатчиликда бўлган юқори малакали шифокорлар жамоаси тезкор тиббий ёрдам кўрсатди. Замонавий тиббий ускуналар ёрдамида юқори технологик, кам инвазив жарроҳлик амалиёти муваффақиятли амалга оширилди ва болакай ҳаёти сақлаб қолинди.
Айни пайтда беморнинг аҳволи барқарор, шифокорлар назорати остида қониқарли ҳолатда.
Бундан аввал Бухорода 11 дона мих ва тўғноғич ютиб юборган йигитга ёрдам кўрсатилганди. 2005 йилда туғилган бемор кўнгил айниши, ошқозон соҳасида оғриқ ва овқат ўтишининг қийинлашиши шикоятлари билан мурожаат қилган. У икки кун олдин кўп миқдорда тўғноғич ва мих ютганини билдирган. Бемор психиатр назоратида рўйхатда турган.
Беморда зудлик билан эндоскопик жарроҳлик амалга оширилиб, босқичма-босқич 5 дона тўғноғич ва 6 дона мих ошқозон ва 12 бармоқли ичак бўшлиғидан олиб ташланган.
2025 йилнинг январида фарғоналик 2 ёшли қизалоқнинг қорнидан 135 та магнит шарча чиқариб олинганди. Ўша ойда қозоғистонлик жарроҳлар 4 ёшли боланинг ичакларидан 39 та магнит шарни олиб ташлаганди. 20 февраль куни Қозоғистоннинг Олмаота шаҳрида жарроҳлар икки ёшли боланинг ошқозонидан 105 дона магнитли мунчоқни чиқариб олгани хабар қилинганди.
Изоҳ (0)