Болалар миллий тиббиёт марказининг болалар онкологи Камол Искандаров мутахассисларни хорижда ўқитиш эмас, балки чет эллик тажрибали ходимларни Ўзбекистонга олиб келиш самаралироқ экани ҳақида гапирди.
— Ёш мутахассисларни хорижга юборишдан кўра, у ердаги малакали шифокорларни юртимизга олиб келиш яхшироқ самара беради. Шу кунгача тиббиёт марказимизга Россия, Беларусь, Туркия, Жанубий Корея ва АҚШ давлатларидан шифокорлар келишди. Хорижлик нейрохирург ва травматолог шифокорларга жарроҳлик амалиётини ўтказиш вазифаси юклатилганди. Улар ўз тажрибасини ўзбек мутахассисларига ўргатди. Улар кетгач, ўзбек шифокорлари орттирган тажрибаси орқали кўплаб муваффақиятли жарроҳлик амалиётини ўтказишди.
Ўзим ҳам Жанубий Кореяда таҳсил олганман. У ерда “Устозинг яхши бўлса, жарроҳлик амалиётига олиб кириб, шогирдига йўл-йўриқ кўрсатади”, деган гап бор.
Болалар миллий тиббиёт марказида фаолият юритаётган шифокорларнинг деярли барчаси инглиз тилини билади. Бу ҳам мутахассиснинг имкониятларини оширади. Шахсан мен ҳозирги марта рус тилидаги тиббиётга оид китобларни ўқиганимни эслолмайман. Чунки энг яхши тиббиёт адабиётлари биринчи инглиз тилида чоп этилади, — дейди болалар онкологи Камол Искандаров.
Шифокор хориждаги ўтказиладиган жарроҳлик амалиётлари Ўзбекистонда ўтказилса, беморларнинг яшаш кўрсатгичи ошиши ва уларнинг маблағи тежалиши ҳақида айтиб ўтди.
— Ҳиндистонда илик кўчириш операцияси 65-85 минг АҚШ долларига ўтказилади. Йўл харажати ва яшашни ҳисобга олганда, 100 минг АҚШ доллари сарфлашга тўғри келади. АҚШ, Германия ва Исроилда ўтказиладиган жарроҳлик амалиётлари эса бундан ҳам қимматроқ. Агар бу амалиёт Ўзбекистонда ўтказилса, бор-йўғи 15-20 минг АҚШ доллари сарфланади. Беморларни операция қилдириш учун давлат ва турли хайрия фондлари кўмаклашишади. Аммо уларга 85 минг АҚШ долларига битта беморни даволатгандан кўра, 20 минг АҚШ долларидан 4 та беморга кўмаклашгани яхшироқ, — дейди болалар онкологи Камол Искандаров.
Изоҳ (0)