Дунё ва ўзбек спортига оид 1 октябрь кунининг энг муҳим хабарлари дайжести билан танишинг.
Ўзбекистон
Чусовитина катта спортга қайтди
Оксана Чусовитина катта спортга қайтганини маълум қилди. Спорт гимнастикаси бўйича 3 карра Жаҳон чемпиони ва 8 карра Олимпия ўйинлари иштирокчиси ўзининг Instagram саҳифасида 2022 йилги Осиё ўйинларига тайёргарлик кўришни бошлаганини эълон қилди.
«Осиё ўйинлари—2022 га тайёргарликни бошлашга қарор қилдим. Фаолиятимни Ўзбекистон учун бирорта ҳам медал қўлга киритмай туриб якунлай олмайман», — дейди Чусовитина.
Эслатиб ўтамиз, 2022 йилги Осиё ўйинлари келаси йилнинг сентябрь ойида ўтказилади.
Фаррух Икромовнинг жарроҳлик амалиёти муваффақиятли ўтди
Ўзбекистон терма жамоаси футболчиси Фаррух Икромов Швецияга қарши ўртоқлик учрашувида жароҳат олгани ва футболчини даволаш учун Италиянинг машҳур жарроҳларидан бири Паоло Мариани жалб этилгани ҳақида хабар берилганди.
ЎФА матбуот хизматининг ёзишича, футболчи Италия пойтахти Римдаги «Вилла Стюарт» клиникасида профессор Мариани томонидан муваффақиятли операция қилинган ва айни пайтда ҳужумчимиз ўзини яхши ҳис қилмоқда.
Жаҳон
УЕФА мусобақалари тарихига кирган Кейн«Тоттенҳэм» ҳужумчиси Ҳарри Кейн Конференциялар Лигаси гуруҳ босқичи 2-туридан ўрин олган «Мура»га қарши ўйинда (5:1) 3 та гол урди.
Шу тариқа англиялик футболчи мусобақа тарихида ҳет-трик қайд этган биринчи ўйинчига айланди.
Кейн, шунингдек, УЕФАнинг учта йирик клуб мусобақаларида ҳет-трик қайд этган учинчи футболчи сифатида тарихга кирди. Унгача Юпп Ҳайнкес ва Герд Мюллердан бундай натижага эришганди.
Азар «Реал»да қолади
«Реал» бош мураббийи Карло Анчелотти жамоа ярим ҳимоячиси Эден Азарни жамоада олиб қолмоқчи.
Marca нашрига кўра, мутахассис Азар жамоанинг асосий футболчиси бўла олишига ишонади.
Қарзга ботиб қолган «Барселона»
«Барселона» молиявий йил якунлари (2020/21) бўйича ҳисобот берди.
Унга кўра, клубнинг операцион даромади бюджетдаги 828 миллионга нисбатан 631 миллион еврони ташкил қилган. Ўтган йилга нисбатан пасайиш 224 миллион евро ёки 26 фоизни ташкил этади.
Харажатлар ўтган мавсумга нисбатан 19 фоизга ошган — 955 миллион евродан 1,136 миллиард еврогача. Бу клуб тарихидаги энг юқори кўрсаткич ҳисобланади.
Бу эса ўз навбатида «Барселона»нинг молиявий йил учун операцион зарарини 505 миллион еврога, соф зарарни эса 481 миллион еврога етказган.
Клубнинг соф қарзи 2021 йил 30 июнь ҳолатига кўра 680 миллион еврони ташкил қилади.
«Самовий маош» олишни хоҳлаётган Ҳоланд
«Боруссия Д» ҳужумчиси Эрлинг Ҳоланд янги клубга ўтган тақдирда қанча маош олмоқчи эканлиги маълум бўлди.
La Gazzetta dello Sport хабарига кўра, футболчининг агенти Мино Райола потенциал харидорлардан Ҳоланд учун йилига 50 миллион евро маош сўрайди. Шу билан бирга ушбу сумма агентлик комиссиясини ўз ичига олмаган.
Германия терма жамоасининг ЖЧ—2022 саралаши доирасидаги октябрь ойида бўлиб ўтадиган ўйинлар учун қайдномаси эълон қилинди.
Ҳанс-Дитер Флик қайдномага қуйидаги футболчиларни киритди.
Дарвозабонлар: Бернд Лено, Мануэль Нойер, Марк-Андре тер Стеген.
Ҳимоячилар: Маттиас Гинтер, Тило Керер, Лукас Клостерманн, Давид Раум, Антонио Рюдигер, Нико Шлоттербек, Никлас Зюле.
Ярим ҳимоячилар ва ҳужумчилар: Карим Адееми, Серж Гнабри, Леон Горетцка, Кай Ҳаверц, Ёнас Ҳофманн, Йозуа Киммих, Томас Мюллер, Жамол Мусиала, Флориан Нойҳаус, Марко Ройс, Лерой Сане, Тимо Вернер, Флориан Вирц.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)