13 февраль куни кам таъминланган ва ижтимоий муҳофазага муҳтож оилаларнинг туғма оёқ нуқсони, мушаклар тортилиши, терининг куйиш асоратлари ташхиси қўйилган 10 нафар фарзанди даволаниш учун Германияга жўнаб кетди, деб ёзади ЎзА.
«Улар 6 ойдан 3 йилгача бўлган муддатда Германия клиникаларида даволаниб қайтади. Бу болаларга фондимизнинг масъул ходимлари ҳамроҳлик қилишади», — деди «Соғлом авлод учун» халқаро хайрия фонди бўлим бошлиғи Жумабек Нуров.
2002 йилда «Соғлом авлод учун» халқаро хайрия фонди, Соғлиқни сақлаш вазирлиги ҳамда Германиянинг Friedensdorf International халқаро ташкилоти ўртасида уч томонлама ҳамкорлик битими имзоланган эди. Ҳамкорлик доирасида 12 ёшгача бўлган бемор ва ногиронлиги бўлган болаларга юқори сифатли тиббий ёрдам кўрсатилмоқда. 2002—2018 йиллар давомида 374 ўзбекистонлик бемор бола терининг куйиш асоратлари, туғма қўл-оёқ бўғимлари ва бошқа ташхислар билан Германиянинг нуфузли клиникаларида даволанди.
Ушбу халқаро ташкилотнинг грант маблағлари ҳисобидан 2018 йилда республика бўйича жами 236 нафар туғма лаб-танглайи нуқсони бўлган ногирон болаларда жарроҳлик амалиёти ўтказилди. «Чиройли оёқчалар» лойиҳаси доирасида туғма оёқ нуқсони (маймоқлик) ва қийшиқ бўйин ташхиси бор 86 нафар 15 ёшгача бўлган болалар операция қилинди. 48 нафар бола терининг куйиш асоратлари сабаб пластик жарроҳлик столига ётқизилди.
Бухоро вилояти Қоракўл тумани Шеробод маҳалласида яшовчи Шаҳзода Худойбердиеванинг ҳам беш ёшида велосипеддан йиқилиши натижасида оёқлари (ўнг тиззасининг пастки қисми) синган эди. Шундан сўнг суягида емирилиш кузатилиб, иккинчи оёғига нисбатан 3 сантиметр калта бўлиб қолганди. Шу боис, 2012 йилда 6 ой, 2015 йилда 1,5 йил Германияда даволаниб келди.
Изоҳ (0)