Самарқанд вилоят перинатал марказида Ўзбекистон соғлиқни сақлаш вазирлиги ҳамда Германия ҳамкорлик ташкилотининг Ўзбекистондаги ваколатхонаси томонидан 8 март — Халқаро хотин-қизлар куни муносабати билан «Юқори технологик тиббий асбоб-ускуналардан фойдаланиш аёллар саломатлигининг гаровидир» мавзусида акция ўтказилди.
Вилоят соғлиқни сақлаш бошқармаси матбуот хизмати раҳбари Элдор Муҳаммадиевнинг «Дарё»га маълум қилишича, акциянинг дастлабки кунида 210 нафар аёл кўкрак бези бўйича тиббий кўрикдан ўтказилиб, 7 нафар аёлда жарроҳлик амалиёти ўтказилган.
– Дастуримиз икки йўналишдан иборат бўлиб, гинекология соҳасида тиббий кўрик ва кам инвазив усулда жарроҳлик амалиётини ўтказамиз, – дейди Россия илмий тадқиқот тиббиёт университети профессори Л.Каппушева. – Мақсадимиз аёлларда учраётган гинекологик касалликларни катта жароҳатларсиз самарали даволаб, фарзанд кўришдек бахтга эришишларига кўмаклашишдан иборат. Мазкур жараёнда аёллар жарроҳлик амалиётидан кейин жуда тез тикланишади.
Акция доирасида онколог-маммологлар томонидан аёлларга кўкрак бези саратонининг келиб чиқиши бўйича ҳам маслаҳатлар бериб борилмоқда.
– Кўкрак бези саратони онкологик касалликлар ичида биринчи ўринда туради, — дейди Республика ихтисослаштирилган онкология ва радиология илмий-амалий текшириш маркази Самарқанд филиали маммологи Парвина Зарипова. – Афсуски, аёлларимиз касалликнинг иккинчи, учинчи босқичларида мурожаат қилишади. Касалликни биринчи босқичида ўз саломатликларидаги ўзгаришни бор-йўғи 10 фоиз аёллар пайқаб, ўз вақтида мурожаат қилади. Бу касалликни ўз вақтида аниқлаш унга қарши курашнинг энг самарали усули. Шу боис ҳафтанинг ҳар шанба куни туманларда кўрик ўтказамиз. Касаллик илк босқичда аниқланган беморлар 90 фоиз ҳолатда соғлом ҳаётга қайтади. Бугунги акциямизнинг мақсади ҳам аёлларимиз саломатлигини асраш, уларнинг муаммоларига ечим топишдан иборат.
Маълумотларга кўра, икки кун ўтган тадбирда кўкрак саратонини олидини олиш мақсадида 450 нафар хотин-қиз ультратовуш скринингдан ўтказилиб, уларга консултатив маслаҳатлар берилди. Худди шундай, 15 та юқори технологияли операция ўтказилди.
Изоҳ (0)