Республика ихтисослаштирилган эндокринология ҳамда Республика ихтисослаштирилган кардиология илмий-амалий тиббиёт марказларининг Қарши филиалларида дастлабки мураккаб операциялар ўтказилди. Бу ҳақда ЎзА хабар берди.
Ҳозирча мавжуд имкониятлари билан Ўзбекистонда ягона бўлган мазкур илмий-амалий тиббиёт марказлари ҳудуд аҳолисининг талаб ва эҳтиёжларидан келиб чиққан ҳолда ташкил этилган. Мазкур марказлар филиалларининг Қарши шаҳрида очилиши, нафақат қашқадарёликлар, балки бошқа вилоятлар ва қўшни республикалар аҳолиси учун ҳам муҳим аҳамиятга эга.
Республика ихтисослаштирилган кардиология илмий-амалий тиббиёт марказининг Қарши филиали 120 ўринга мўлжалланган бўлиб, бу ерда реабилитация ва юрак ишемик касалликлари, сурункали юрак етишмовчилиги ва аритмология, артериал-гипертензия, рентген-эндоваскуляр жарроҳлик, кардиожарроҳлик, қабул диагностика каби бўлимлар, кунлик 100 қатновга мўлжалланган поликлиника фаолияти йўлга қўйилган. Илгари бундай жарроҳлик амалиётлари бирор хориж давлатида ва Тошкентда амалга оширилар эди.
Президент ташаббуси билан ташкил этилган ушбу марказда мураккаб операцияларни амалга ошириш учун барча имконият яратилди. Малакали мутахассислар жалб қилинди. Уларнинг кўпчилиги Германия ва Россия давлатларида тажриба орттириб қайтган.
Шу куни Республика ихтисослаштирилган эндокринология илмий-амалий тиббиёт маркази Қарши филиалида ҳам 4 нафар бемор операция қилинди. 50 ўринли янги марказ ана шу беморлар эҳтиёжини тўлиқ таъминлашга хизмат қилади. Диабетик нефропатия, умумий эндокринология ва болалар, қалқонсимон без касалликлари ва эндокрин жарроҳлик, диабетик тўпиқ жарроҳлиги, лаборатория-диагностика бўлимлари, 50 қатновга мўлжалланган поликлиникани ўз ичига олган марказда йилига 700-800 жарроҳлик амалиёти ўтказилиши кўзда тутилмоқда.
Изоҳ (0)