Озарбайжон Сурияга газ етказиб беришни бошлайди. Президент Илҳом Алиев ва унинг суриялик ҳамкасби Аҳмад аш-Шараъа тегишли келишувга эришди.
Томонлар 12 июль куни бўлиб ўтган учрашувда энергетика соҳасидаги ҳамкорлик масалаларини муҳокама қилган.
Яқин келажакда Туркия ҳудуди орқали Озарбайжон газини Сурияга экспорт қилиш лойиҳаси амалга оширилади. Бу ушбу мамлакатнинг энергия хавфсизлигини таъминлашга ҳисса қўшади, дейилади Озарбайжон президенти матбуот хизмати хабарида.
Алиев Сурия собиқ ҳокимияти даврида Озарбайжон билан икки томонлама алоқалар турғун бўлганини эслатди. У янги сиёсий раҳбарият иш бошлаганидан сўнг, икки давлат ўртасидаги муносабатларни ривожлантириш учун катта имкониятлар очилганини таъкидлади.
Президент Аҳмад аш-Шараъа эса Суриянинг собиқ ҳукумати мамлакатнинг халқаро алоқаларига жиддий зарар етказганини айтди. У янги раҳбарият Озарбайжон билан сиёсий, савдо-иқтисодий, маданий-гуманитар ва бошқа соҳаларда фаол ҳамкорлик қилишдан манфаатдор эканини билдирди.
Суҳбат давомида Озарбайжонда суриялик талабаларга стипендиялар ажратиш, шунингдек, Суриядаги маданий ёдгорликларни реставрация қилишга оид масалалар юзасидан ҳам фикр алмашилган.
Бу Алиев ва аш-Шаръанинг иккинчи учрашувидир. Сиёсатчилар биринчи марта апрель ойида Анталияда кўришган. Май ойида Сурия президенти Озарбайжон делегациясини қабул қилган. Ўшанда икки томонлама муносабатлар, минтақавий воқеалар ва иқтисодий масалалар муҳокама қилинган.
2025 йил март ойи ҳолатига кўра, Озарбайжон 12 та давлатга газ етказиб берган, улардан ўнтаси Европага тўғри келади. 2025 йилда Боку ташқи бозорларга 25 миллиард куб метр газ сотган. Сурия газни асосан ўзида ишлаб чиқарган ёки Араб давлатлари орқали чекланган ҳажмда импорт қилган.
Изоҳ (0)