Турк ва яҳудий расмийлари Сурияда ҳарбий тўқнашувларнинг олдини олиш учун техник даражадаги музокараларни бошлади. Уларга Озарбайжон мезбонлик қилмоқда. Бу ҳақда Туркия ташқи ишлар вазирлиги ва Исроил сиёсий доираларидаги манбаларга таяниб Reuters маълум қилди.
Турк манбаларига кўра, ушбу мулоқотдан мақсад икки давлат ҳарбий кучлари фаолият юритаётган Сурияда эҳтимолий тушунмовчиликлар ва тўқнашувларнинг олдини олишдир.
“Бу механизмни шакллантириш бўйича ишлар давом этади”, деган турк расмийси музокаралар доираси ва давомийлиги каби тафсилотларни очиқламай.
Исроил ҳукумати ҳам турк расмийлари билан учрашувни тасдиқлади. Бош вазир Биньямин Нетаньяху идораси баёнотига кўра, Исроил делегациясига музокараларда миллий хавфсизлик маслаҳатчиси Цохи Ҳанегби бошчилик қилган. Аммо баёнотда учрашув тафсилотлари ошкор этилмаган.
Исроилдаги манбанинг Reuters’га маълум қилишича, Тель-Авив музокараларда Суриядаги хорижий кучларга оид ҳар қандай ўзгариш, хусусан, Палмира ҳудудида Туркия ҳарбий базаси ташкил этилиши улар учун “қизил чизиқ” бўлишини ва мазкур қадам яҳудий давлати томонидан “қоидаларни бузиш” сифатида баҳоланишини билдирган.
Маълум қилинишича, Туркия армияси бунга қадар Суриядаги камида учта ҳарбий ҳаво базасини текшириб, қўшин жойлаштириш режаларини муҳокама қилган. Улар орасида Палмирададаги Т-4 базаси ҳам бор.
Туркия ва Исроил муносабатлари 2023 йилнинг 7 октябрь воқеаларидан бери кескин бўлиб қолмоқда. Бироқ шунга қарамай, ҳар икки томон Сурияда тўғридан тўғри қарама-қаршиликка боришни истамаяпти.
Туркия ташқи ишлар вазири Хоқон Фидан музокаралар бошланганини тасдиқлаб, бундай механизмлар “икки минтақавий куч ўртасида тушунмовчиликларнинг олдини олишда зарур” эканини таъкидлади.
Изоҳ (0)