Жорий йилнинг 24 январь куни Эрон президенти Иброҳим Раиси Туркия раҳбари Ражаб Тоййиб Эрдўғон билан учрашди. Сиёсатшунос Равшан Ғозиев “Дарё” билан суҳбатда Туркия ва Эрон раҳбарлари ўзаро муҳокама қилган асосий мавзулардан бири – Озарбайжон орқали ўтувчи Зангазур йўлаги эканлигини айтиб ўтди.
Сиёсатшуноснинг таъкидлашича, Эрон Зангазур йўлаги ишга тушишига қаршилик қилмоқда.
“Туркия ва Эрон келиша олмайдиган яна бир сиёсий масала – бу Зангазур йўлаги. Эрон ушбу логистик йўлак ишга тушишига қаршилик қилмоқда. Чунки бу йўлак ишга тушса, Эрондан ўтувчи транзит йўлларининг мавқе тушиб кетиши мумкин. Бундан ташқари, минтақада Туркия ва Озарбайжоннинг мавқейи ортиб кетади. Ҳозир Туркия Эронни кўндиришга уринмоқда”, – дейди Равшан Ғозиев.
Зангазур йўлагининг аҳамияти
Озарбайжоннинг Зангазур йўлаги, кўп тармоқли транспорт йўналиши Туркия ва Марказий Осиё ўртасида юкларни етказиб беришни осонлаштиришда муҳим ўрин тутади. Ушбу йўлак барча минтақавий иштирокчиларга юкларнинг ярмидан кўпини Туркиядан Марказий Осиёга, асосан, Озарбайжон ҳудуди орқали олиб ўтадиган ноёб йўналиш сифатида фойдаланишдаги аҳамияти юқори.
Ушбу коридорнинг ишга туширилиши билан Ироқ, Сурия ва Ўрта Ер денгизининг жанубий портларидан Туркия орқали транзит ўтадиган юк ташиш ҳажми ортади. Таҳлилчиларнинг фикрича, йўлак Шарқ-Ғарб ва Шимол-Жануб транспорт йўлакларида муҳим бўғин бўлиб, барча минтақа мамлакатларига фойда келтиради ва номинал ялпи ички маҳсулоти 1,1 триллион доллар бўлган минтақавий иқтисодиётларни ўзида мужассам этган Евросиё савдо ва транспорт коммуникацияларига ҳисса қўшади.
Изоҳ (0)