АҚШ 8 июль куни Суриянинг “Ҳайъат Таҳрир аш-Шом” (ҲТШ) гуруҳини хорижий террорчилик ташкилотлари рўйхатидан чиқаришини маълум қилди. Бу ҳақда BBC хабар берди.
Гуруҳ декабрь ойида Сурияда 54 йил ҳукмронлик қилган Асад режимини ағдариб ташлаган исёнчиларга бошчилик қилган. Унинг раҳбари Аҳмад Аш-Шараъа энди мамлакатнинг вақтинчалик президенти ҳисобланади. ҲТШ, шунингдек, “Ал-Нусра фронти” номи билан ҳам танилган. У 2016 йилда Аш-Шараъа алоқаларни узгунга қадар “Ал-Қоида”нинг Суриядаги филиали бўлган.
Сўнгги ойларда Ғарб давлатлари оғир санкцияларга учраган Сурия билан муносабатларни тиклашга интилмоқда. Июнь ойи охирида АҚШ президенти Дональд Трамп мамлакатга қарши санкцияларини расман тугатиш тўғрисидаги фармонни имзолаганди. Оқ уй бу ҳаракат мамлакатнинг “барқарорлик ва тинчлик йўлини” қўллаб-қувватлаш учун мўлжалланганини билдирган. Оқ уй Сурия янги ҳукуматининг Исроил билан алоқаларни нормаллаштириш ва Фаластин террор гуруҳларини тақиқлаш бўйича ҳаракатларини кузатишини билдирган.
Сурия ташқи ишлар вазири Асад аш-Шибонийга кўра, санкцияларнинг олиб ташланиши мамлакат иқтисодиётни тиклаш йўлидаги “тўсиқни олиб ташлайди ва мамлакатни халқаро ҳамжамият учун очади”.
Дам олиш кунлари Буюк Британия ташқи ишлар вазири Девид Леммининг Сурия давлатига ташрифи бўлиб ўтган. У Аш-Шараъа билан учрашиб, узоқ муддатли тикланишни қўллаб-қувватлаш ва суриялик қочқинларга ёрдам бериш мақсадида 94,5 миллион фунт стерлинг гуманитар пакетни тақдим этган. Аввалроқ Буюк Британия Сурия Мудофаа ва Ички ишлар вазирликларига нисбатан санкцияларни бекор қилганди.
13 йиллик фуқаролар урушидан сўнг Асад режими ағдарилганда, Сурия аҳолисининг 90 фоизи қашшоқлик чегарасида қолган эди. Аш-Шараъа ўша пайтда “янги Сурия”ни қуришни ваъда қилганди. Март ойида янги хавфсизлик кучлари ва Асад тарафдорлари ўртасидаги тўқнашувлар юзага келган. Ўшанда озчилик бўлган алавий мазҳабидан юзлаб тинч аҳоли ҳалок бўлганди. Апрель ойида эса қуролли гуруҳлар, хавфсизлик кучлари ва друз диний озчилик жангчилари ўртасида зиддиятлар келиб чиққан. Июнь ойига келиб Дамашқдаги черковга уюштирилган худкушлик ҳужумида 25 киши ҳалок бўлганди.
Изоҳ (0)