АҚШнинг Сан Антонио шаҳрида президент Дональд Трампга таҳдид қилишда айбланаётган 52 ёшли эркак қамоққа олинди. Бу ҳақда Техас штатининг Ғарбий округи прокурори идораси маълум қилди.
Тергов маълумотларига кўра, қамоққа олинган шахс — Роберт Эррера — Facebook’да Трампнинг сел оқибатида зарар кўрган штатга режалаштирилган ташрифи олдида унга таҳдидли изоҳлар ёзган. У постнинг остига “Мен аниқ нишонга оламан”, деган жумлани ёзиб, Трампнинг ўтган йилнинг июлида юз берган суиқасд куни туширилган суратини илова қилган. Бошқа бир постида у ҳужум милтиғи ва ўқдонлар суратини ҳам жойлаштирган.
Эррера ўша куниёқ қамоққа олинган. Унга қўйилган ҳар бир айб бўйича беш йилгача қамоқ жазоси таҳдид солмоқда. Ҳозирда тергов ишлари билан Федерал қидирув бошқармаси, Сан Антонио полицияси ва АҚШ Махфий хизмати шуғулланмоқда.
Шунингдек, комик Себастьян Хоц Х ижтимоий тармоғида АҚШ президенти Дональд Трампга суиқасд уюштирилишини маъқуллаган пости учун Берлин суди олдида жавоб бериши маълум бўлди.
Нашрнинг ёзишича, комедиячи ҳукм чиқарилгунга қадар изоҳ беришдан бош тортган. Бунга унинг 14 июль куни Трампга ҳужумдан сўнг эълон қилинган ва кейинроқ ўчириб ташланган “Фашистларнинг ўлими мутлақо ажойиб”, деган пости сабаб бўлган.
Трампга биринчи суиқасд 2024 йил 13 июлда Пенсилванияда содир бўлган — у қулоғидан жароҳат олган. Бир кишини қутқариб қолишнинг иложи бўлмади, яна икки киши яраланди. Ҳужумчи йўқ қилинди. Иккинчи ҳужум сентябрь ойида содир бўлган — қуролланган жиноятчи Трампнинг Флоридадаги голф клубида қўлга олинди.
Изоҳ (0)