AQSH Federal qidiruv byurosi prezidentlikka nomzod Donald Trampga qilingan hujumni suiqasd va ichki terakt sifatida tekshirmoqda. Siyosatchini o‘ldirishga urinishda ayblanayotgan 20 yoshli Tomas Metyu Kruks qariyalar uyida ishlagan. Bu haqda CNN xabar berdi.
Tergovchilar yigitning ijtimoiy tarmoqlarida hujum motivlarini ko‘rsatadigan hech narsa topmagan. Tomas Kruksning telefoni, miltiq va ehtimoliy portlovchi moslamasi Federal qidiruv byurosining (FQB) Virjiniya shtati Kvantiko shahridagi laboratoriyasiga yuborilgan.
Jurnalistlarning so‘zlariga ko‘ra, Kruks ota-onasi bilan Pitsburgning tinch chekkasidagi Betel parkda, qotillik sodir bo‘lgan joydan taxminan 70 km uzoqlikda yashagan. 2022-yilda u maktabni matematika va tabiiy fanlar bo‘yicha erishgan natijalari uchun 500 dollar mukofot bilan tugatgan. Kruks rasman Respublikachilar partiyasi tarafdori sifatida ro‘yxatga olingan.
Shu bilan birga, uch yil oldin u Demokratik partiyani qo‘llab-quvvatlovchi ActBlue tashkilotiga pul (atigi 15 dollar) xayriya qilgan.
Ma’lum bo‘lishicha, yigit Bethel Park Skilled Nursing and Rehabilitation Center qariyalar uyida dietolog yordamchisi bo‘lib ishlagan. Hamshiralardan biri jurnalistlarga u yerda tintuv o‘tkazilganini aytgan. Suiqasd paytida Kruks millionlab obunachilarga ega bo‘lgan, qurol va portlovchi qurilmalar videosini joylashtiriladigan Demolition Ranch (YouTube kanali) logotipi tushirilgan futbolkada bo‘lgan. Kruksning shaxsini yigitning otasiga tegishli AR miltig‘i yordamida aniqlangan.
Tomas Kruks o‘q uzgan qurol olti oydan ko‘proq vaqt oldin otasi tomonidan qonuniy ravishda sotib olingan. Otasi qurolni o‘g‘liga berganmi yoki Kruks uni ruxsatsiz olganmi, aniq emas. Hozirda oila tergov guruhi bilan hamkorlik qilmoqda.
“Otishma sodir etgan shaxsning ruhiy salomatligi bilan bog‘liq muammolar borligi haqida hech qanday dalil topilmagan. Byuroning asosiy vazifasi otishmaning maqsadini aniqlash”, — deydi terrorizmga qarshi kurash bo‘limi direktori yordamchisi Robert Uells.
“Hozirda bizda mavjud bo‘lgan maʼlumotlarga ko‘ra, otishma sodir etgan erkak yolg‘iz o‘zi harakat qilgan va hozirda jamoat xavfsizligiga hech qanday tahdid yo‘q”, — deydi qotillikka urinish bo‘yicha tergovga masʼul agent Kevin Royke.
Donald Trampga suiqasd
AQSHning sobiq prezidenti Donald Tramp 14-iyul kuni Pensilvaniyaning Batler shahridagi saylovoldi mitingi paytida yaralangan edi. Hodisa aks etgan videoda uning chiqishi chog‘ida o‘q ovoziga o‘xshash tovushlar eshitilgan. Shundan so‘ng Tramp qulog‘ini ushlab yotib olgan. Qo‘riqchilar shu zahoti Trampni o‘rab olgan. Prezidentlikka nomzod o‘rnidan turganida qulog‘idan qon oqayotganini ko‘rish mumkin. Maxsus xizmat agentlari uni qurshab olib, ko‘tarilishga yordam bergan va sahnadan olib ketgan.
Bu hodisa qotillikka urinish sifatida baholanmoqda. O‘q uzgan shaxs maxsus xizmat xodimlari tomonidan o‘ldirilgan.
Ayni paytda siyosatchining ahvoli yaxshi ekani aytilmoqda. AQSHning amaldagi prezidenti Jo Bayden Trampning xavfsizlikda ekanini hamda o‘zini yaxshi his qilayotganini eshitganidan xursandligini bildirgan. Har ikki yirik partiyaning amerikalik siyosatchilari Trampni qo‘llab-quvvatlovchi va siyosiy zo‘ravonlikni qoralovchi bayonotlar bilan chiqmoqda.
Izoh (0)