Фарғонада йўл четида кетаётган одамни Gentra уриб юборгани ҳақида хабарлар тарқалганди. Вилоят ИИБ жабрланган эркак вафот этганини маълум қилди.
Қайд этилишича, 10 июль куни фуқаро Ф.З. Фарғона шаҳар Ўзбекистон овози кўчасида таниши М.А. билан ўзаро гап талашиб жанжаллашиб, ўзига тегишли Lacetti автомобилида М.А.ни уриб юбориб, тан жароҳати етказган. Кўрсатилган тиббий муолажаларга қарамасдан М.А. шифохонада вафот этган.
Мазкур ҳолат юзасидан Ф.З.га нисбатан Фарғона шаҳар ИИБ ҳузуридаги Тергов бўлими томонидан Жиноят кодексининг 104-моддаси 3-қисми (қасддан баданга оғир шикаст етказиш жабрланувчининг ўлишига сабаб бўлиши) билан жиноят иши қўзғатилган. Гумонланувчи Ф.З. Жиноят-процессуал кодексининг 221-моддаси тартибида ушланган.
Жиноят кодексига кўра, қасддан баданга оғир шикаст етказиш оқибатида жабрланувчи вафот этса, айбдор шахс 8 йилдан 10 йилгача озодликдан маҳрум қилиш билан жазоланади.
Ижтимоий тармоқларда Тошкентда икки нафар ҳайдовчи ўртасидаги зиддият акс этган видео ҳам тарқалганди. Lacetti ҳайдовчиси Cobaltʼни “дубинка” билан уриб қочиб кетган. Расмийлар ҳолат юзасидан маъмурий баённома расмийлаштирилиб, ҳужжатлар қонуний чора кўриш учун судга юборилганини маълум қилди.
Изоҳ (0)