Россия ва Беларусь “ишончли, объектив ахборот тақдим этадиган” ва “суверен” сунъий интеллект тизимини биргаликда ишлаб чиқмоқчи. Бу ҳақда Россия-Беларусь Иттифоқи котиби Сергей Глазев маълум қилди.
“Ёшлар хорижий, айниқса, АҚШ ва Хитойда ишлаб чиқилган сунъий интеллект моделларидан тобора кўпроқ таъсирланмоқда. Улар манипуляцияга заиф”, деди Глазев.
Унинг сўзларига кўра, Ғарбда синовдан ўтказилган машҳур чатботлардан бири ирқчилик ва экстремистик фикрларни, жумладан, фашизмни улуғлаш ҳолатларини намоён этган.
Глазев сунъий интеллект платформалари тадбиркорлик ва инновацияларни қўллаб-қувватлаши, аммо, шу билан бирга, “асосий анъанавий қадриятларни” сақлаши кераклигини таъкидлади.
“Қадриятларсиз тадбиркорлик — бу вайронкор ва маъносиз ҳаракат”, деди у.
Мазкур ташаббус Россия ва Беларуснинг Ғарб технологияларидан мустақил бўлиш, рақамли суверенитетни мустаҳкамлаш йўлидаги саъй-ҳаракатлари фонида илгари сурилмоқда. Хусусан, Украинадаги уруш ва Ғарб санкцияларидан сўнг Россия маҳаллий сунъий интеллект тизимларига устуворлик бера бошлади.
Шу билан бирга, халқаро тадқиқотчиларда Россия сунъий интеллект тизимларининг шаффофлиги ва бетарафлигига оид шубҳалар бор. Бельгиядаги Гент университети тадқиқотига кўра, Россиянинг энг йирик тил моделлари YandexGPT ва GigaChat сиёсий цензура даражаси бўйича дунёдаги энг юқори кўрсаткичларни қайд этган. Улар муҳим сиёсий саволларга жавоб беришдан қочган ёки мавзуни муҳокама қилмасликни тавсия қилган.
Изоҳ (0)