Эфиопияда Нил бўйида мега-тўғон қурилиши якунланди. Лойиҳа Миср ва Судан давлатлари билан кескинликка сабаб бўлиб келмоқда. Бу ҳақда BBC хабар берди.
Тўғон қурилиши 2011 йилда 4 миллиард доллар бюджет билан бошланганди. У Африканинг энг йирик гидроэлектростанцияси бўлиб, эфиопияликлар учун катта ғурур манбаи ҳисобланади. Тўғон расман Буюк Эфиопия Уйғониш даври тўғони (Герд) деб аталади.
Мамлакат тўғонни ўзининг энергия эҳтиёжларини қондириш учун жуда муҳимлигини таъкидламоқда. Аммо Миср ва Судан лойиҳани “сув таъминотига таҳдид солади” деб ҳисоблайди. Эфиопия бош вазири Абий Аҳмед лойиҳа якунлангани ҳақидаги баёнотда шундай деди:
“Қуйидаги қўшниларимиз — Миср ва Суданга хабаримиз аниқ: Уйғониш даври тўғони таҳдид эмас, балки умумий имкониятдир. Умумий тараққиёт ва умумий энергиядан биргаликда фойдаланайлик”.
АҚШ президенти Дональд Трамп 2020 йилда Миср тўғонни портлатиш билан таҳдид қилганини айтганди. Абий сентябрь ойида бўлиб ўтадиган расмий очилиш маросимига Миср ҳам, Судан ҳам таклиф қилинишини маълум қилган.
Миср президенти Абдулфаттоҳ ас-Сиси ва Судан ҳарбий бошлиғи Абдулфаттоҳ ал-Бурҳон шу ҳафта бошида учрашиб, “Кўк Нил ҳавзасида ҳар қандай бир томонлама чоралар рад этилишини” таъкидлаган.
Баландлиги 145 метр бўлган тўғон Шимолий Эфиопия тоғларидаги Кўк Нил ирмоғида жойлашган. У ердан Нил сувининг 85 фоизи оқиб чиқади. Эфиопия тўғондан электр энергия ишлаб чиқаришда фойдаланмоқчи. Чунки мамлакат аҳолисининг аксарияти — тахминан 60 фоизи — электр энергияга муҳтож.
Миср эса чучук суви таъминотида Нил дарёсига таянади ва сувнинг оқими бузилиши мумкинлигидан қўрқади. Мамлакатга кўра, Нилдан олинадиган сув миқдорининг атиги 2 фоизга камайиши 200 000 акр суғориладиган ернинг йўқолишига олиб келиши мумкин. Судан ҳам Нил сувига қаттиқ боғланган. У ҳам Миср каби ташвишлардан хавотирда. Абий Эфиопия икки давлат билан “конструктив алоқа ўрнатишга тайёрлигини” билдирган. Бироқ у аввалги музокараларда келишувга эриша олмаганди.
Изоҳ (0)