АҚШ президенти Дональд Трамп 3 июль куни Саудия Арабистони мудофаа вазири шаҳзода Холид бин Салмон билан учрашди. Бу ҳақда манбаларга таяниб Axios хабар берди.
-VS5FMXrq.avif)
Улар Эрон билан боғлиқ вазият, Ғазодаги урушни тугатиш, ҲАМАС гаровида қолганларни озод қилиш ва бошқа минтақавий масалаларни муҳокама қилган. Музокаралар Исроил бош вазири Биньямин Нетаньяхунинг 7 июль куни Оқ уйга ташрифи олдидан бўлиб ўтган. Трамп маъмурияти яқин ойларда Саудия Арабистони ва Исроил ўртасида тарихий тинчлик битими тузилишини талаб қилмоқчи, дейилади хабарда.
Трамп билан учрашувдан сўнг Саудия ташқи ишлар вазири Эрон қуролли кучлари бош штаби бошлиғи генерал майор Абдураҳим Мусавий билан телефон орқали гаплашган.
Биз минтақадаги вазиятни, хавфсизлик ҳамда барқарорликни таъминлаш бўйича амалга оширилаётган ҳаракатларни муҳокама қилдик, деган у.
АҚШ президенти махсус вакили Стив Уиткофф ядровий музокараларни қайта тиклаш учун келаси ҳафта Эрон ташқи ишлар вазири Аббос Ароқчи билан учрашмоқчи. Трамп аввалги баёнотларида Эрон АҚШ билан мулоқотни истаётгани ва “буни амалга ошириш вақти келганини” айтганди.
Манбаларга кўра, 12 кунлик уруш пайтида Эрон томонидан Исроилга учирилган дронларни тутиб олишда Саудия Арабистони иштирок этган. Бунинг учун Саудия минтақавий ҳаво ҳудудида, жумладан, Ироқ ва Иордания осмонида дронларни тутиб олувчи вертолётларни жойлаштирган. Баъзи дронлар Исроил томон ҳаракатланишда давом этиши мумкин эди. Бироқ улар Саудия суверенитети таҳдид остида қолмаслиги учун эрта тутиб олинган.
Саудия Арабистони кучли ҳарбий ҳаво кучларига эга бўлиб, у асосан АҚШда ишлаб чиқарилган замонавий қуроллар, самолётлар ва ҳимоя тизимларига таянган. 2017 йилда АҚШ президенти Дональд Трампнинг биринчи президентлик даврида Саудия валиаҳд шаҳзодаси Муҳаммад бин Салмон билан йирик қурол-яроғ битими имзоланган. Бу битим кейинчалик 2025 йил Трампнинг минтақага қилган ташрифи чоғида кенгайтирилган.
Саудия Арабистони расмий равишда ҳужумларнинг олдини олишда иштирок этганини тасдиқламаган. Аксинча, Эрон ҳудудига ҳужум қилгани учун Исроилни қоралаган. Саудия Арабистони ўз ҳаво ҳудудидан Эрондаги нишонларга зарба бериш учун фойдаланишга рухсат бермаслигини таъкидлаган.
Изоҳ (0)