Словакия Европа Иттифоқининг Россияга қарши 18-санкциялар пакетини қўллаб-қувватлаши мумкин. Мамлакат аввалроқ бунга қарши чиққан эди. Аммо Братислава бунинг учун иттифоқчилари олдига шарт қўймоқда. Унга кўра, Словакияга рус газини сотиб олишда давом этиши учун имкон берилиши керак.
12 июль куни журналистлар билан гаплашган Словакия бош вазири Роберт Фико санкциялар пакетига қўйилган блок ечилишининг асосий шарти сифатида Россия газига тақиқ юмшатилиши кераклигини таъкидлади.
“Биз бу курашда ҳеч бўлмаганда бирор нарса ютишимиз керак, албатта, 100-0 бўлмайди”, деди Фико.
Унинг айтишича, бу масала Германия ва Франция раҳбарлари билан муҳокама қилинган. Фико Словакия Еврокомиссия ва ЕИ давлатларидан сиёсий кафолатлар олишни истаётганини билдирди.
“Биз бу масалани сешанбагача ҳал қилишни хоҳлаймиз, чунки барча томонларда кескинлик ортиб боряпти”, дея қўшимча қилди бош вазир.
Словакия Россияга қарши санкцияларни нега блоклади?
Еврокомиссия 10 июнь куни Россияга қарши 18-санкциялар пакетини тақдим этганди. У Россиянинг энергетика соҳаси, банк тизими ва ҳарбий саноатидан тушаётган даромадларига зарба беришни мақсад қилган. Аммо Москва билан яқин алоқадаги икки давлат — Словакия ва Венгрия мазкур ташаббусни қўллаб-қувватлашдан бош тортди.
9 июль куни маълум бўлишича, иттифоқчиларнинг Россияга қарши 18-пакет муҳокамалари Словакия сабаб яна бир бор барбод бўлган. Кейинроқ ОАВда бош вазир Фиконинг Россияга қарши санкцияларни блоклаш бўйича элчига буйруқ бергани ҳақида хабарлар тарқалди.
Изоҳ (0)