Дональд Трамп маъмуриятининг Нигериядаги USAID дастурларининг 80 фоизини тўхтатиш қарори Жаҳон озиқ-овқат дастури (WFP) томонидан кўрсатилаётган озиқ-овқат ёрдамининг тўхташига олиб келди. Натижада август ойидан бошлаб 1,3 миллион киши ёрдамсиз қолади, дея хабар бермоқда The Independent.
Июль ойига келиб маблағлар тугайди. Одамлар оч қолиши муқаррар — бу молиялаштириш қисқартирилишининг тўғридан тўғри оқибатидир, деди WFP вакили Чи Лаэл.
АҚШ Нигерияда WFP бюджетининг асосини ташкил этган 200 миллион долларлик шартномаларни бекор қилган. Бу эса минтақалардаги инқирозни янада чуқурлаштирди. WFP клиникалари ёпилиши натижасида 300 минг бола даволаниш имкониятидан маҳрум бўлади.
Илгари Lancet журнали Трамп даврида гуманитар бюджетларнинг қисқариши 2030 йилга келиб 14 миллион қурбонга олиб келиши мумкинлигини башорат қилган эди. Нигерия апрель ойида мисли кўрилмаган сув тошқинларидан сўнг озиқ-овқат хавфсизлиги бўйича фавқулодда ҳолат эълон қилди.
АҚШ давлат котиби Марко Рубио маълум қилишича, АҚШ Халқаро тараққиёт агентлиги (USAID) 1 июлдан бошлаб ташқи ёрдам дастурларини бошқаришни расман тўхтатди.
Изоҳ (0)