AQSHning sobiq prezidenti Donald Tramp 14-iyul kuni Pensilvaniyaning Batler shahridagi saylovoldi mitingi paytida yaralandi. Bu haqda BBC xabar berdi.
Hodisa aks etgan videoda uning chiqishi chog‘ida o‘q ovoziga o‘xshash tovushlar eshitilgan. Shundan so‘ng Tramp qulog‘ini ushlab yotib olgan. Qo‘riqchilar shu zahoti Trampni o‘rab oldi. Prezidentlikka nomzod o‘rnidan turganida qulog‘idan qon oqayotganini ko‘rish mumkin. Maxsus xizmat agentlari uni qurshab olib, ko‘tarilishga yordam berdi va sahnadan olib ketdi.
Trampga u chiqish qilayotgan sahna yaqinidagi binodan o‘q uzilgan. O‘q uzgan shaxs maxsus xizmat xodimlari tomonidan o‘ldirilgan. Gumondorning shaxsi haqida hozircha ma’lumot yo‘q. The New York Times ma’lumotiga ko‘ra, surishtiruv ishlari Maxfiy xizmat tomonidan olib borilmoqda, ammo unga boshqa idoralar, xususan Federal qidiruv byurosi ham jalb etiladi.
Maxfiy xizmatlar vakili Tramp ayni vaqtda “xavfsizlikda” ekanini bildirdi. Trampning saylov kampaniyasi vakili ham sobiq prezidentning “ahvoli yaxshiligi” va mahalliy tibbiyot muassasasida tibbiy ko‘rikdan o‘tganini ma’lum qilgan. Batler okrugi prokurorining yozishicha, o‘q Trampni “tirnab o‘tgan”. CBS News ma’lumotiga ko‘ra, hodisadan uch soat o‘tib sobiq prezident shifoxonani tark etgan.
Izoh (0)