Исроил ҳарбий ҳаво кучлари томонидан 12 кунлик уруш давомида берилган зарбалардан бирида Эрон президенти Масъуд Пезешкиён жароҳат олган. Бу ҳақда Iran International хабар берди.
Эроннинг Фарс агентлиги тафсилотларга аниқлик киритиб, ҳужум Олий хавфсизлик кенгаши йиғилиши бўлиб ўтаётган бинога берилганини маълум қилди.
Манбаларга кўра, Исроил бу операцияни “Ҳизбуллоҳ” етакчиси Ҳасан Насруллоҳга уюштирилган суиқасдга ўхшаш усулда амалга оширган. Исроил самолётлари бинонинг кириш ва чиқиш жойларини нишонга олиб, эвакуация йўлларини тўсиб қўйган.
Зарбалар сабаб бинода электр узилган. Расмийлар фавқулодда чиқиш эшиги орқали ташқарига чиқишга муваффақ бўлган. Президент Пезешкиён айни шу ерда оёғидан жароҳат олган.
Аввалроқ эронлик қўмондон Моҳсен Резоий Фарс агентлигига интервью бериб, Исроил ҳаво кучлари Олий хавфсизлик кенгаши йиғилиши вақти олти нуқтага зарба берганини айтган эди.
Исроил ва Эрон: 12 кунлик уруш
Жорий йилнинг 13 июнь кунидан бошлаб Эроннинг қатор ҳудудларига берилган зарбаларда мамлакат ҳарбий эшолонининг юқори мартабали қўмондонлари ҳамда ядро физиклари ўлдирилди. Қолаверса, қатор ядровий объектлар нишонга олинди.
Эрон эса бунга жавобан Исроилга ракета зарбалари йўллади. 22 июнь куни можарога АҚШ ҳам аралашиб, Фордо, Натанз ва Исфаҳондаги ядровий объектларга “бункер тешувчи” бомбалар билан зарба берди. 24 июнь куни эса сулҳ эълон қилинди.
Изоҳ (0)