Божхона қўмитасида божхона органлари фаолиятининг 2025 йил I ярим йиллик якунларига бағишланган ҳайъат мажлиси бўлиб ўтди. Бу ҳақда қўмита ахборот хизмати хабар берди.
Келтирилишича, дастлабки ярим йилликда ўтган йилнинг шу даврига нисбатан ташқи савдо товарлари 5 фоизга, шу жумладан, экспорт ҳажми 7 фоизга, расмийлаштирилган божхона юк декларациялари 12 фоизга кўпайди.
Божхона чегаралари орқали ҳаракатланган юкли автотранспортлар 165 мингтага, юкли вагонлар 376 мингтага, йўловчилар сони 3,3 млн нафарга ошди. Йиғилишда давлат бюджетига божхона тўловларидан тушумлар ундирувчанлигини ошириш, иқтисодий хавфсизликни таъминлаш, контрабанда товарлари олиб ўтилишига қарши курашиш, кадрлар билан ишлаш тизимини яхшилаш, шунингдек, тадбиркорларга қулай шарт-шароитларни яратиш ва ижтимоий соҳа объектларини қўллаб-қувватлаш борасида амалга оширилган ишлар таҳлил қилинди.
Таъкидланишича, тадбиркорларни қўллаб-қувватлашга қаратилган чора-тадбирлар натижасида 11 мингдан ортиқ тадбиркорларга 24,6 трлн сўм божхона тўловларидан имтиёз ва преференсиялар қўлланилди, 2,8 трлн сўм божхона тўловларини кечиктириб тўлашга рухсат берилди.
Давлат бюджетига 34 трлн сўм божхона тўловлари ўтказилиб, белгиланган режа ижроси тўлиқ таъминланди. Божхоначилар томонидан аниқланган 19 мингдан зиёд контрабанда ва божхона қонунбузилиши ҳолатларида қиймати 564 млрд сўмлик товар-моддий бойликларнинг божхона чегаралари орқали ноқонуний олиб ўтилиши ва ички ҳудуддаги яширин айланмасига чек қўйилди.
Айниқса, ноқонуний муомаладан олиб қўйилган валюта қимматликлари ўтган йилнинг шу даврига нисбатан 3 баробарга, заргарлик буюмлари эса қарийб 2 баробарга ортган. Ҳисобот даврида божхона ходимлари 1247 кг гиёҳвандлик воситалари, 156 кг психотроп ва кучли таъсир этувчи моддаларни тўхтатиб қолди.
Халқаро валюта жамғармаси Ўзбекистонда самарасиз божхона имтиёзлари бекор қилинса, иқтисодий ўсиш 3,2 фоизгача ошишини маълум қилган эди. Шунингдек, Ўзбекистонда айрим товарларга нисбатан импорт божини икки карра ошириб қўллаш амалиётини бекор қилиш кўзда тутилган қонун Сенатда маъқулланганди.
Изоҳ (0)