Telegram мессенжеридаги каналларда Қашқадарё вилоятида бир вақтнинг ўзида 7 нафар ЙПХ инспектори пора олгани учун судлангани ва қамалгани ҳақида хабар берилганди. Республика Йўл ҳаракати хавфсизлиги хизмати матбуот котиби Зойир Йўлдошев буни рад этиб, судланганлар собиқ ЙПХ инспекторлари эканига аниқлик киритди. “Дарё” судланган ходимлар қилмиши билан қизиқди.
Маълум бўлишича, 2025 йилнинг 17 июнь куни жиноят ишлари бўйича Косон туман судида суд раиси Фозил Юсупов бошчилигида ўз вазифасини лозим даражада бажармаслик эвазига пора олиб келган ИИБ ходимлари иши кўриб чиқилган.
Судда аниқланишича, Қашқадарё вилоятида фаолият юритувчи тўрт нафар ЙПХ инспектори, бир нафар карантин тадбирларини таъминлаш гуруҳи сафдор ходими ва “Умакай” ўсимликлар карантини чегара маскани инспектори билан тил бириктириб, лозим даражадаги вазифасини бажармай, эвазига пора олиб келган.
Қайд этилишича, бош вазирнинг 2023 йил 27 сентябрдаги хати асосида ички ишлар вазири ҳамда Қашқадарё вилояти ҳокими вилоят ИИБ бошлиғига қора металл парчалари ва чиқиндиларини ноқонуний сотиб олиш, улардан фойдаланиш ва сотишни бартараф этиш ҳамда вилоят ҳудудидан ноқонуний чиқиб кетилишининг олдини олиш бўйича топшириқ берган. Топшириққа асосан 2023 йил 17 июлда Қашқадарё вилояти ИИБ бошлиғи, Божхона бошқармаси бошлиғи ва “Ўзметкомбинат” АЖ “Қашқадарё ИҚМ” филиали бошлиғи “Қашқадарё вилояти ҳудудида қора металл парчалари ва чиқиндилари ноқонуний айланмасининг олдини олиш чора-тадбирлари” режасини ишлаб чиққан.
Судланган ИИБ ходимлари мана шу режада белгиланган вазифаларига беписандлик қилиб, вилоят ҳудудида қора металл парчалари ва чиқиндиларининг ноқонуний айланмаси билан шуғулланувчи фуқаронинг металлар ортилган юк машиналарини текширмасдан, Кўкдала туманидаги “Умакай” мунтазам ЙПХ масканидан ўтказиб юбориш билан шуғулланган. Улар бу каби ишларни 2023 йилнинг октябрь—декабрь ойларида амалга ошириб келган. Натижада ҳар бир ИИБ ходими хизмат ҳақи учун давомли тарзда 100 минг сўмдан 5 миллион сўмгача миқдорда пора олиб келган.
Суд 6 нафар ИИБ ходими ишини кўриб чиқиб, уларнинг 3 нафарига 5 йил, қолган уч нафарига эса 3 йил муддатга озодликдан маҳрум қилиш жазосини тайинлади.
Изоҳ (0)