Сирдарё вилоятида ноқонуний йўллар билан қимматбаҳо заргарлик буюмларини айланмага киритишга уринишга чек қўйилди. Бу ҳақда вилоят божхона бошқармаси хабар берди.
Маълум қилинишича, Оқолтин туманида ўтказилган махсус тадбир натижасида фуқаро Р.А. заргарлик буюмларини 69 минг долларга сотишга келишиб, олдиндан 20 минг доллар олган вақтида қўлга олинди.
Тадбир давомида фуқародан жами 38 дона, жумладан, 11 дона тилладан ясалган заргарлик буюмлари, 12 дона эркак ва аёллар учун тилла соатлар, 15 дона олмос тошлардан тайёрланган заргарлик буюмлари ашёвий далил сифатида олинди.
Буюмларнинг дастлабки баҳоси 892 миллион сўмни ташкил қилмоқда.
Ҳозирда ҳолат юзасидан терговга қадар текширув ва суриштирув ишлари олиб борилмоқда.
Чегарада “сарсон бўлган” заргарлик буюмлари
Божхоначилар йил бошидан буён салкам 40 кг заргарлик буюмларининг ноқонуний олиб ўтилишига чек қўйди.
Жумладан, “Тошкент-Аэро” ихтисослаштирилган божхона комплексининг Тошкент халқаро аэропорти чегара божхона постида заргарлик буюмларини қонунга хилоф тарзда олиб киришга бўлган қатор уринишлар фош қилинди.
Бангкокдан учиб келган йўловчилардан бири юклари орасидаги ширинликлар ичига қиймати 180 млн сўмдан ошиқ бўлган 121 грамм оғирликдаги заргарлик буюмларини яширганча олиб киришга уринган вақтида тўхтатиб қолинди.
Тошкент—Истанбул рейси бўйича учиб келган қўшни давлат фуқароси ҳам багажидаги юклари орасида қиймати 350 млн сўмлик 370 грамм оғирликдаги заргарлик буюмларини яшириб олиб кираётганида фош қилинди.
Бокудан келган йўловчилар орасида ҳам қимматбаҳо тошлар билан безатилган тилла тақинчоқларни божхона назоратига тақдим қилмасдан олиб ўтишга уринган шахс борлиги аниқланди. Қўшни давлат фуқароси бўлган мазкур йўловчи қиймати салкам 130 млн сўмлик ҳамда олмос тошлари билан безатилган 74 грамм оғирликдаги заргарлик буюмларини ноқонуний равишда олиб киришга уринган.
Рақамларга кўра, республика божхоначилари томонидан 2025 йилнинг ўтган даври мобайнида аниқланган 252 та божхона қонун бузилиши ҳолатларида қиймати 24,3 млрд сўмлик салкам 40 кг оғирликдаги заргарлик буюмларининг божхона чегаралари олиб ноқонуний равишда олиб ўтилиши ва ички ҳудуддаги яширин айланмасига чек қўйилган.
Шунингдек, Тошкент вилоятида фуқаро жинсий аъзолари ичида 1 млрд сўмлик тақинчоқни яширинча олиб ўтмоқчи бўлганди. Самарқандда эса фуқаро қадимий тилла тангаларни Истанбулга яширинча олиб кетмоқчи бўлганда ушланганди.
Изоҳ (0)