Ўзбекистонда 2021 йилдан озиқ-овқат, нефть ва электротехника каби тармоқларда 73 та акциз солиғи бекор қилинади. Бу ҳақда Президент Шавкат Мирзиёев 29 декабрь куни Олий Мажлисга йўллаган Мурожаатномасида маълум қилди.
Бундан ташқари, заргарлик соҳасида келгуси йил 1 мартдан бошлаб кумушни биржа орқали ишлаб чиқарувчиларга эркин сотиш тартиби ўрнатилади.
«Автомобиль саноатида соғлом рақобат муҳитини ривожлантириш ва корхоналарга тенг шароитлар яратиш орқали соҳада ишлаб чиқарувчилар сони кўпайтирилади», — деди Президент Шавкат Мирзиёев.
Давлат раҳбарининг қайд этишича, ҳозирги кунда давлат харидларида атиги 4 фоиз тадбиркор қатнашмоқда. Келгуси йилда 24 та йирик давлат корхонасига давлат хариди бўйича очиқ-ошкора талаблар жорий этилади. Натижада маҳаллий тадбиркорлар ҳар йили камида 10 триллион сўмлик маҳсулотларини ушбу корхоналарга сотиш имкониятига эга бўлади.
«Бундан буён барча давлат харидлари жамоатчилик ва Парламент назоратида бўлади», — дея алоҳида қайд этди Шавкат Мирзиёев.
Мавзуга доир:
- Жиззах вилояти ҳокимининг қизига тегишли компания кўчаларга гул экиш бўйича 1,9 млрд сўмлик яна бир тендерни ютиб олгани маълум бўлди
- «Жиззахча тендерлар-2». Бир неча юз млрд сўмлик лойиҳаларни вилоят ҳокими ўринбосарининг қариндошлари қўлга киритгани маълум бўлди
- Хоразм вилояти ҳокими ўринбосарининг укасига тегишли компания тендерда 20 млрд сўмлик давлат буюртмасини ютгани маълум бўлди
Айниқса, нефтгаз-кимё, металлургия, машинасозлик, электротехника, фармацевтика, қурилиш материаллари, тўқимачилик, чарм-пойабзал, озиқ-овқат ҳамда «яшил иқтисодиёт» билан боғлиқ саноат тармоқлари иқтисодиётнинг «драйверлари»га айланиши учун етарли шароит мавжуд. «Бу тармоқларда хусусий секторнинг ташаббуслари ва янги лойиҳаларини қўллаб-қувватлаш ҳамда кооперацияни ривожлантириш бўйича чоралар кўрилиши лозим», — деди Президент.
Шавкат Мирзиёев ҳукуматга 2021 йил 1 апрелгача истиқболли саноат кластерлари рўйхатини аниқлаб, уларни жадал ривожлантириш учун алоҳида дастур ишлаб чиқиш бўйича топшириқ берди.
Келгусида эса «божхона ҳудудида қайта ишлаш режими»да саноат маҳсулотлари ишлаб чиқаришни кўпайтириш зарурлиги, шу билан бирга, инвестиция сиёсатини юритишда давлат иштирокини пасайтириб, хусусий ва тўғридан-тўғри инвестициялар улушини ошириш керак, деди давлат раҳбари.
Геология соҳасида 2020 йилда 21 та кон ва истиқболли майдонлар очиқ аукцион орқали инвесторларга сотилди. 2021 йилда яна 50 та кон ва истиқболли майдонлар маҳаллий ва чет эллик инвесторларга очиқ механизмлар асосида сотилади.
Умуман, келгуси йилда Ўзбекистон ўз олдига 23 миллиард долларлик инвестицияларни ўзлаштириш вазифасини қўйган. Бунинг натижасида 2021 йилнинг ўзида 226 та йирик саноат ва инфратузилма объектларини ишга тушириш кўзда тутилган.
Мавзуга доир:
- Шавкат Мирзиёев: «Давлат иштирокидаги корхоналар давлатнинг ўзига оғир юк бўляпти»
- Ўзбекистонда электр энергияси улгуржи бозори шакллантирилади, суюлтирилган газ импорти учун божлар бекор қилинади
- Шавкат Мирзиёев 2021 йилни Ёшларни қўллаб-қувватлаш ва аҳоли саломатлигини мустаҳкамлаш йили деб эълон қилди
Изоҳ (0)