“Қишлоқ хўжалиги экинлари уруғликларининг сифатини баҳолаш тизимини тубдан ислоҳ қилиш чора-тадбирлари тўғрисида”ги президент фармони қабул қилинди.
Унга кўра, қишлоқ хўжалиги экинлари уруғликларининг сифатини баҳолашда рақамли QR-кодли ёрлиқлаш, шунингдек, уруғликларни етиштириш ва реализация қилиш билан шуғулланувчи тадбиркорлар реестрини юритишга асосланган янги тизим жорий этилади.
Ҳужжатда қайд этилишича, қишлоқ хўжалиги экинлари уруғликларининг сифатини баҳолашда шаффоф ва бозор тамойилларига асосланган тартибни жорий этиш, соҳага халқаро тажрибаларни татбиқ этиш орқали экспортбоп қишлоқ хўжалиги маҳсулотлари етиштиришни кўпайтириш, озиқ-овқат хавфсизлиги ва нархлар барқарорлигини таъминлаш мақсад қилинган.
Фармонда белгиланишича, 2026 йил 1 январдан Божхона қўмитаси томонидан рақамли QR-кодли ёрлиқланмаган ва ижобий экинбоплик хулосаси олинмаган импорт қилинаётган қишлоқ хўжалиги экинларининг уруғликларини “эркин муомалага чиқариш” божхона режимига расмийлаштириш тақиқланади.
2026 йилдан QR-кодли ёрлиқланмаган ва ижобий экинбоплик хулосаси олинмаган қишлоқ хўжалиги экинларининг уруғликларини реализация қилган тадбиркорларга БҲМнинг 150 бараваригача (1 августдан бошлаб БҲМ 412 минг сўм бўлади), яъни 61,8 миллион сўмгача маъмурий жарима қўлланади.
“Қишлоқ хўжалиги маҳсулотлари сифатини баҳолаш маркази” давлат муассасаси қишлоқ хўжалиги экинлари уруғликларининг сифатини баҳоловчи ягона ваколатли ташкилот сифатида белгиланди.
Қишлоқ хўжалиги экинлари уруғликларининг сифатини баҳолаш 2 босқичда амалга оширилади:
- марказ ходимлари туман апробация комиссиялари таркибида уруғлик экин майдонларида ўтказиладиган апробацияда қатнашади ва ўсимликнинг морфологик белгиларига асосан уруғликларнинг навдорлигини баҳолашдан ўтказади, навдорлик гувоҳномасини расмийлаштиради ва ахборот тизимига жойлаштиради;
- марказ томонидан қишлоқ хўжалиги экинларининг уруғликлари аккредицияланган лабораторияларда синовдан ўтказилади ва натижалари бўйича уруғликларни экиш учун яроқлилигини тавсифловчи кўрсаткичлар мажмуи асосида экинбоплик хулосаси берилади.
Республикадаги илмий-тадқиқот муассасалари илмий ва тажриба-синов тадқиқотларини ўтказиш учун импорт қилган ҳамда илмий тажриба участкасида тайёрланган қишлоқ хўжалиги экинлари уруғликларини рақамли QR-кодли ёрлиқлаш ва экинбоплик хулосаси бериш бепул амалга оширилади.
Шавкат Мирзиёев 2024 йил сентябрида қишлоқ хўжалигидаги ислоҳотлар ижросига оид тақдимот билан танишганда “Асосий мақсадимиз қишлоқ хўжалигини илмий асосланган, БМТнинг Озиқ-овқат ва қишлоқ хўжалиги ташкилотининг энг яхши тажрибаларини татбиқ қилган ҳолда ривожлантириш”, деб айтганди. 2025 йилда 4 миллион 800 минг гектарда экинлар етиштириш мўлжалланган. Шундан 2 миллион гектардан зиёд ерда мева-сабзавот, картошка, дуккакли ва полиз маҳсулотлари экилади. Уларнинг далаларда жойлаштирилиши ва ҳосилнинг захирага жамланиши мониторинг қилиб борилади.
Изоҳ (0)