Ўзбекистон ва Қозоғистон тўртта чегара постида янги юк автомобиллари ҳаракатини йўлга қўймоқчи. Бу ҳақда Божхона қўмитаси хабар берди.
Унга кўра, Олмаотага сафар доирасида Божхона қўмитаси раиси Қозоғистон молия вазирлигининг давлат даромадлари қўмитаси раиси билан икки томонлама учрашув ўтказди. Иккала давлат ўртасида савдо айланмасини кенгайтириш бўйича тасдиқланган дастурга кўра, 2030 йилга бориб Ўзбекистон—Қозоғистон ўртасидаги ташқи савдо ҳажмини 10 млрд АҚШ долларига етказиш назарда тутилган.
Бу эса божхона хизматлари олдига ҳам қатор вазифаларни қўяди. Чегара божхона постларида юкли автотранспорт воситалари навбатларини бошқариш, қишлоқ хўжалиги маҳсулотлари учун соддалаштирилган тартибларни назарда тутувчи “яшил йўлак” режимини жорий қилиш шулар жумласидан.
Бу борада июнь ойидан Ўзбекистондаги чегара-божхона постларида босқичма босқич жорий қилинаётган “Электрон навбат” тизими бўйича тўхталиб ўтилди. Мазкур тизим илк бор айнан Қозоғистон билан чегарада жойлашган “Навоий” божхона постида жорий қилинади.
Мулоқотда божхона хизматлари ўртасида ахборот алмашинувини янада кенгайтириш, хусусан йирик инспексион мажмуаларидан олинган сканер тасвирларини ўзаро алмашиш имкониятлари кўриб чиқилди. Шунингдек, божхона постлари орқали ҳаракатланган енгил автотранспорт воситаларига доир маълумотларни алмашишнинг техник шартлари муҳокама қилинди.
Иккала давлат ўртасидаги “Оқ олтин”—“Селиннй” ҳамда “Малик”—“Сирдарё” чегара божхона постлари орқали бўш юк автотранспорт воситалари ва йирик габаритли бўлмаган юклар ҳаракатини йўлга қўйиш масаласи ҳам кўриб чиқилди. Бу энг аввало Ўзбекистоннинг “Яллама”, “Нажимов” ва “Сирдарё” чегара божхона постлари ва унга туташ Қозоғистоннинг чегара божхона постларидаги юклама ва тирбандликларни сезиларли равишда қисқаришига олиб келади.
Учрашувда иккала давлатда божхона хизмати вакилларини таъсис этиш бўйича келишув ҳам муҳокама қилинди. Шунингдек, томонлар ўзаро ҳамкорликнинг янги режасини кўриб чиқди. Режада ўтказиш пунктларини қайта қуриш ва реконструкция қилиш ишларини жадаллик билан давом эттириш назарда тутилган.
Жумладан, “Ғишткўприк” ва “Довуд ота” чегара божхона постларидаги қурилиш жараёнларини якунлаш билан бир қаторда “Сирдарё” чегара божхона постини қайта қуриш назарда тутилган. Шунингдек, ўзаро савдога доир божхона статистикаси бўйича ҳамкорликни такомиллаштириш, бунда турли номувофиқликларнинг тўлиқ олдини олиш зарурлиги қайд этилди.
Томонлар божхона лабораториялари ўртасида ва кадрлар малакасини ошириш бўйича ҳамкорликни назарда тутувчи келишувларни кўриб чиқди. Учрашув якунида иккала давлат божхона хизматлари ўртасидаги ўзаро ҳамкорликка янгича руҳ берувчи 3 та ҳужжат имзоланди.
Ўзбекистон ваколатли органлари билан келишилган ҳолда жисмоний шахслар, енгил автомобиллар, автобуслар ва юк кўтариш қуввати 3,5 тоннагача бўлган автотранспорт воситалари учун “Тажен” назорат-ўтказиш пункти орқали ҳаракатланиш вақтинча тўхтатилди. “Тажен”—“Довут ота” ўтказиш пунктлари орқали енгил автотранспорт, автобуслар ва 3,5 тоннагача бўлган юк транспортининг кесишиши ва ўтиши 2025 йил 1 февралдан постни реконструкция қилиш даврида вақтинча тўхтатилганди.
Изоҳ (0)