Bojxona qo‘mitasida bojxona organlari faoliyatining 2025-yil I yarim yillik yakunlariga bag‘ishlangan hay’at majlisi bo‘lib o‘tdi. Bu haqda qo‘mita axborot xizmati xabar berdi.
Keltirilishicha, dastlabki yarim yillikda o‘tgan yilning shu davriga nisbatan tashqi savdo tovarlari 5 foizga, shu jumladan, eksport hajmi 7 foizga, rasmiylashtirilgan bojxona yuk deklaratsiyalari 12 foizga ko‘paydi.
Bojxona chegaralari orqali harakatlangan yukli avtotransportlar 165 mingtaga, yukli vagonlar 376 mingtaga, yo‘lovchilar soni 3,3 mln nafarga oshdi. Yig‘ilishda davlat byudjetiga bojxona to‘lovlaridan tushumlar undiruvchanligini oshirish, iqtisodiy xavfsizlikni ta’minlash, kontrabanda tovarlari olib o‘tilishiga qarshi kurashish, kadrlar bilan ishlash tizimini yaxshilash, shuningdek, tadbirkorlarga qulay shart-sharoitlarni yaratish va ijtimoiy soha obyektlarini qo‘llab-quvvatlash borasida amalga oshirilgan ishlar tahlil qilindi.
Ta’kidlanishicha, tadbirkorlarni qo‘llab-quvvatlashga qaratilgan chora-tadbirlar natijasida 11 mingdan ortiq tadbirkorlarga 24,6 trln so‘m bojxona to‘lovlaridan imtiyoz va preferensiyalar qo‘llanildi, 2,8 trln so‘m bojxona to‘lovlarini kechiktirib to‘lashga ruxsat berildi.
Davlat byudjetiga 34 trln so‘m bojxona to‘lovlari o‘tkazilib, belgilangan reja ijrosi to‘liq ta’minlandi. Bojxonachilar tomonidan aniqlangan 19 mingdan ziyod kontrabanda va bojxona qonunbuzilishi holatlarida qiymati 564 mlrd so‘mlik tovar-moddiy boyliklarning bojxona chegaralari orqali noqonuniy olib o‘tilishi va ichki hududdagi yashirin aylanmasiga chek qo‘yildi.
Ayniqsa, noqonuniy muomaladan olib qo‘yilgan valyuta qimmatliklari o‘tgan yilning shu davriga nisbatan 3 barobarga, zargarlik buyumlari esa qariyb 2 barobarga ortgan. Hisobot davrida bojxona xodimlari 1247 kg giyohvandlik vositalari, 156 kg psixotrop va kuchli ta’sir etuvchi moddalarni to‘xtatib qoldi.
Xalqaro valyuta jamg‘armasi O‘zbekistonda samarasiz bojxona imtiyozlari bekor qilinsa, iqtisodiy o‘sish 3,2 foizgacha oshishini maʼlum qilgan edi. Shuningdek, O‘zbekistonda ayrim tovarlarga nisbatan import bojini ikki karra oshirib qo‘llash amaliyotini bekor qilish ko‘zda tutilgan qonun Senatda ma’qullangandi.
Izoh (0)