Mamlakatda soliq tushumlari yalpi ichki mahsulotga nisbatan pasayib borayotgani byudjet barqarorligiga tahdid soladi. Bu haqda Xalqaro valyuta jamg‘armasi maʼlum qildi.
Jamg‘arma tahliliga ko‘ra, O‘zbekiston hukumati 2025-yil byudjetiga yangi soliq imtiyozlarini qo‘shmoqda va mavjudlarini uzaytirishni nazarda tutmoqda. Mazkur qaror soliq bazasi o‘sishiga to‘sqinlik qiladi. Aslida soliq bazasini kengaytirish zarur.
“Ayrim aksiz soliq stavkalari (masalan, alkogol mahsulotlari, yoqilg‘i, avtotransport vositalari va shakar) oshirilsa, daromadlar yalpi ichki mahsulotga nisbatan 1,1 foizgacha ko‘payishi mumkin. Investitsiyalarga va yuridik shaxslar daromad solig‘ida daromadga bog‘liq imtiyozlarni qayta ko‘rib chiqish (mavjud imtiyozlarni kengaytirish yoki yangilarini joriy etishdan tiyilish) ham daromadlarni YIMga nisbatan 1,1 foiz bandgacha oshiradi. Samarasiz bojxona imtiyozlarini bekor qilish hamda yangilarini bermaslik esa tushumlarni YIMga nisbatan 3,2 foiz bandgacha oshirishi mumkin”, deyiladi tahlilda.
Jamg‘arma jismoniy shaxslardan olinadigan daromad solig‘i stavkasini progressiv qilishni ham tavsiya etgan. Yaʼni bunda ko‘p daromad topganlar ko‘proq soliq to‘lashi kerakligi nazarda tutilgan. Qayd etilishicha, bu chora soliq tizimidagi adolatni taʼminlaydi.
“Soliq qo‘mitasi 2025—2030-yillarga mo‘ljallangan islohotlar strategiyasini tezroq tasdiqlashi zarur. Yashirin iqtisodiyotiga qarshi kurashish strategiyasini ham qo‘llab-quvvatlash muhim. Bunda naqd pulsiz to‘lovlarni rag‘batlantirish katta ahamiyatga ega”, deya o‘z tavsiyalarini bergan XVJ.
Avvalroq mamlakatda to‘lanmagan soliqlar miqdori 8,5 trillion so‘mga yetgani maʼlum qilingandi.
Izoh (0)