Ўзбекистондан Қозоғистонга 1,2 миллион доллар ноқонуний олиб чиқилишига чек қўйилди.
Давлат хавфсизлик хизмати ходимлари томонидан божхона идоралари билан ҳамкорликда Тошкент вилоятининг Тошкент туманида жойлашган “Навоий” чегара-божхона постида тезкор тадбир ўтказилганда қўшни давлат томон ҳаракатланаётган Lacetti тўхтатилиб, холислар иштирокида кўздан кечирилганда, унда йўловчи сифатида кетаётган, Тошкент туманида яшовчи, 1978 йилда туғилган фуқарога тегишли целлофан пакетда 874 минг АҚШ доллари борлиги маълум бўлган.
Аниқланишича, у мазкур пул маблағини декларациясиз, божхона назоратидан яшириб, Қозоғистонга олиб ўтмоқчи бўлган.
Шунингдек, тезкор тадбир давом эттирилиб, ушбу хорижий валюталарни Тошкент шаҳридаги бозорларда савдо қилувчи шахслардан йиғиб, мазкур аёлга берган — пойтахтда истиқомат қилувчи, 1989 йилда туғилган фуқаронинг Тошкент туманидаги вақтинча яшаш хонадони кўздан кечирилганда, келгусида Қозоғистонга олиб ўтиш учун тайёрлаб қўйилган 399 минг 170 АҚШ доллари борлиги ҳам аниқланган.
Ўтказилган тезкор тадбир давомида жами 1 миллион 273 минг 170 АҚШ доллари ашёвий далил сифатида олинган.
Ҳозирда мазкур шахсларга нисбатан Жиноят кодексининг 25,182-моддасининг (божхона тўғрисидаги қонунчиликни бузиш) 2-қисми “а” банди билан жиноят иши қўзғатилиб, қамоқ эҳтиёт чораси қўлланилди. Тергов ҳаракатлари олиб борилмоқда.
Чегарадан ноқонуний олиб ўтиш ҳолатлари
2025 йил 31 январь куни куни Фарғонада 483 миллион сўмлик заргарлик буюмларини яшириб олиб кирилишига чек қўйилди. 10 февраль куни Туркманистондан Ўзбекистонга 1,3 млрд сўмлик дизель ноқонуний ўтказилаётганда тўхтатиб қолинди.12 март куни Бухорода тарихий тангалар ва кўкрак нишонларини яширинча Россияга олиб кетаётган шахс ушланди. 14 март куни Тошкент шаҳридаги “Сергели” божхона пости орқали авто эҳтиёт қисмлари сифатида олиб ўтилмоқчи бўлган юк, аслида бутун самосвал бўлиб чиқди.
Изоҳ (0)