АҚШ 1 августдан бошлаб Қозоғистондан келадиган товарлар учун 25 фоизлик бож жорий этади. Бу ҳақда президент Дональд Трамп ўзининг Truth Socialʼдаги саҳифасида маълум қилди.
Сиёсатчи қозоғистонлик ҳамкасби Қосим-Жўмарт Тўқаевга тегишли мактубни йўллади. Унда Трамп республика билан “янада мувозанатли ва адолатли САВДО” ўрнатиш ҳақида сўз юритган.
Қозоғистон билан савдо алоқаларимизни йиллар давомида муҳокама қилдик. Қозоғистоннинг тариф ва нотариф сиёсати ҳамда савдо тўсиқлари туфайли юзага келган савдо тақчилликларидан воз кечишимиз кераклиги ҳақида хулосага келдик. Афсуски, бизнинг муносабатларимиз ўзаро манфаатли бўлишдан йироқ эди.
2025 йил 1 августдан бошлаб АҚШга юбориладиган барча Қозоғистон маҳсулотларига, тармоқ тарифларидан ташқари, 25 фоизлик божхона тарифи белгилаймиз. Юқори тарифдан қочиш мақсадида қайта жўнатилган товарлар ўша юқори тарифга тортилади. 25 фоизлик миқдор мамлакатингиз билан мавжуд савдо тақчиллиги номутаносиблигини бартараф этиш учун зарур бўлган миқдордан анча паст.
Агар Қозоғистондаги компаниялар АҚШ ҳудудида маҳсулот ишлаб чиқаришга қарор қилса, ҳеч қандай тариф қўлланмайди. Бундан ташқари, биз рухсатномаларни тез, профессионал ва мунтазам равишда — яъни бир неча ҳафта ичида олишингиз учун барча чораларни кўрамиз, дейилади мактубда.
Таъкидланишича, худди шундай мактубларни АҚШ президенти Малайзия (25 фоизлик бож), Лаос (40 фоиз), Жанубий Африка (30 фоиз), Мьянма (40 фоиз), Япония (25 фоиз) ва Жанубий Корея (25 фоиз) етакчиларига ҳам йўллаган.
Изоҳ (0)